ملیر کینٹ:پٹڑی عبور کرنیوالا نوجوان ٹرین کی زد میں آگیا

کراچی:  شہر کے مختلف علاقوں میں حادثات و واقعات میں 2 افراد ہلاک جبکہ 3 افراد زخمی ہوگئے ۔

تفصیلات کے مطابق ملیر کینٹ کے علاقے میں ٹرین کی پٹڑی عبور کرتے ہوئے ٹرین کی زد میں آکر نوجوان ہلاک ہوگیا ، متوفی کی لاش ضابطے کی کارروائی کے لیے جناح اسپتال پہنچائی گئی ، مقتول کی شناخت اس کی جیب سے برآمد ہونے والے شناختی کارڈ کے ذریعے نصیر اللہ ولد سید کے نام سے ہوئی جس میں گھر کا پتہ باجوڑ ایجنسی کا درج تھا۔

، ڈاکس کے علاقے میں تیز رفتار گاڑی کی ٹکر سے موٹر سائیکل سوار 18 سالہ نعمان حیدر زخمی ہوگیا جسے تشویشناک حالت میں سول اسپتال پہنچایا گیا ، ایس ایچ او ڈاکس آصف جاکھرانی کے مطابق متوفی کچھ دیر موت و زیست کی کشمکش میں مبتلا رہنے کے بعد دم توڑ گیا ، متوفی سلطان آباد کا رہائشی اور فشریز میں ملازمت کرتا تھا ، اسٹار گیٹ کے قریب ٹرین کی پٹڑی عبور کرتے ہوئے 50 سالہ ارشد شدید زخمی ہوگیا ۔

جسے جناح اسپتال پہنچایا گیا ، اسپتال ذرائع کے مطابق مضروب کی ایک ٹانگ کٹ گئی ہے ، ٹاور پر تیز رفتار گاڑی کی ٹکر سے موٹر سائکل سوار 25 سالہ علی حیدر ولد جمعہ خان زخمی ہوگیا جسے ابتدائی طبی امداد کے لیے سول اسپتال پہنچایا گیا ، نارتھ ناظم آباد میں شپ اونر کالج کے قریب تیز رفتاری کے باعث رکشا ڈرائیور سے بے قابو ہوکر الٹ گیا ۔

جس سے 28 سالہ وسیم ولد نوید زخمی ہوگیا ، مضروب کو فوری طور پر عباسی شہید اسپتال لے جایا گیا ۔