بنگلہ دیش کا بھارت کو ’او آئی سی‘ میں شامل کرنے کا مطالبہ

انڈونیشیا اور پاکستان کے بعد سب سے زیادہ مسلمان بھارت میں بستے ہیں

ویب ڈیسک May 06, 2018

او آئی سی کے کونسل برائے وزرائے خارجہ کا دو روزہ اجلاس ڈھاکا میں ہوا جس میں یہ مطالبہ کیا گیا۔ فوٹو:ریڈیو پاکستان

بنگلہ دیش نے بھارت کو مسلمان ممالک کی عالمی تنظیم 'او آئی سی' میں بطور مبصر رکنیت دینے کا مطالبہ کردیا ہے۔

بین الاقوامی خبر رساں ایجنسی کے مطابق بنگلہ دیش نے اسلامی ممالک کی تنظیم او آئی سی (Organization Of Islamic Cooperation) میں اصلاحات کا مطالبہ کرتے ہوئے کہا ہے کہ بھارت کو مبصر رکن کی حیثیت سے او آئی سی شامل کرلیا جائے۔ بنگلہ دیش کا موقف ہے کہ دنیا بھر کے وہ غیر اسلامی ممالک جن میں مسلمانوں کی بڑی تعداد رہائش پذیر ہے انہیں بھی 'او آئی سی' میں جگہ دے دینی چاہیے۔ ایسے ممالک کو مبصر رکن کے طور پر شامل کیا جا سکتا ہے۔

ڈھاکا میں او آئی سی کی کونسل برائے وزرائے خارجہ کا دو روزہ اجلاس ہوا جس میں بنگلہ دیش کے وزیر خارجہ عبد الحسن علی نے بھارت کی او آئی سی میں شمولیت کا مطالبہ کیا۔ بنگلہ دیشی وزیر کا کہنا تھا کہ اسلامی ممالک کی تنظیم کے ڈھانچے میں تبدیلی کی ضرورت ہے جس کے تحت وہ غیر اسلامی ممالک جہاں مسلمان آبادی زیادہ ہو انہیں بطور مبصر رکن کے شامل کیا جانا چاہیئے۔ مسلمانوں کی زیادہ آبادی والے غیر اسلامی ممالک کو خود سے علیحدہ نہیں کیا جا سکتا۔

واضح رہے کہ مسلمانوں کی عالمی آبادی کا تقریباً دس فیصد بھارت میں آباد ہے جو انڈونیشیا اور پاکستان کے بعد سب سے زیادہ ہے۔ بھارت میں 18 کروڑ 20 لاکھ مسلمان رہتے ہیں جب کہ بنگلہ دیش میں اس سے کم یعنی 140 ملین اور نائیجریا میں 95 ملین مسلمان آباد ہیں۔