سعودی عرب نے حوثی باغیوں کے ایک اور بیلسٹک میزائل حملے کو ناکام بنادیا

ریاض پر داغے گئے میزائل ایرانی ساختہ ہیں اور انہیں یمن سے حوثی باغیوں نے فائر کیا، سعودی حکام

ویب ڈیسک May 09, 2018

سعودی عرب نے حوثی میزائل کو فضاء میں ہی ناکارہ بنا دیا۔ فوٹو : فائل

سعودی عرب نے دارالحکومت ریاض پر حوثی باغیوں کی جانب سے داغے گئے میزائل کو فضاء میں ہی تباہ کردیا۔

عرب میڈیا کے مطابق حوثی باغیوں نے سعودی عرب کے دارالحکومت ریاض پر ایک بار پھر بلاسٹک میزائل حملہ کیا ہے۔ حوثی باغیوں کی جانب سے داغے گئے دونوں میزائل کو سعودی عرب کے ایئر ڈیفنس نے فضاء ہی میں تباہ کرکے شہریوں کو بڑے نقصان سے بچالیا۔ حملے میں استعمال ہونے والے میزائل ایرانی ساختہ ہیں۔

عینی شاہدین کا کہنا ہے کہ انہیں ریاض کے مرکز میں زوردار دھماکوں کی آوازیں سنائی دیں۔ جس کے بعد آسمان پر شعلے بلند ہوتے ہوئے بھی دیکھے۔ علی الصبح سعودی میڈیا نے حوثی میزائل حملے کو ناکام بنانے سے آگاہ کیا۔

واضح رہے کہ گزشتہ ایک ماہ کے دوران یمن کے حوثی باغیوں نے سعودی عرب کی حدود میں 5 سے زائد مرتبہ میزائل داغے ہیں تاہم ہر بار سعودی ایئر ڈیفنس نے بروقت کارروائی کر کے میزائل کو فضاء میں ہی تباہ کردیا تھا جس کی وجہ سے ان حملوں میں کسی قسم کا جانی نقصان نہیں ہوا تھا۔