میئر لندن کا عوامی مقامات پر جنک فوڈ کے اشتہارات پر پابندی لگانے کا فیصلہ

نوجوانوں بالخصوص کم عمر لڑکوں میں بڑھتے ہوئے موٹاپے کو کنٹرول کرنے لیے سخت اقدامات ضروری ہیں، میئر لندن

ویب ڈیسک May 11, 2018

صادق خان کو شہریوں میں بڑھتے ہوئے موٹاپے پر تشویش ہے (فوٹو: فائل)

لندن کے میئر صادق خان نے شہریوں کو موٹاپے سے محفوظ رکھنے کے لیے عوامی مقامات پر جنک فوڈ کے اشتہارات پر پابندی لگانے کا فیصلہ کیا ہے۔

بین الاقوامی میڈیا رپورٹس کے مطابق پاکستانی نژاد لندن کے میئر صادق خان نے شہریوں بالخصوص بچوں میں بڑھتے ہوئے موٹاپے پر گہری تشویش کا اظہار کرتے ہوئے اس 'ٹائم بم' کے نقصانات کو کم کرنے کے لیے ٹھوس منصوبہ تیار کیا ہے۔ منصوبے کے تحت ابتدائی طور پر بسوں، بس اسٹاپس، ٹیوبز، لندن اوور گراؤنڈ اور دیگر مقامات پر جنک فوڈ کے کسی بھی قسم کے اشتہارات پر پابندی لگانے کا فیصلہ کیا گیا ہے۔

یہ بھی پڑھیں: لندن میں ہم جنس پرستوں کے حق میں ریلی، میئر صادق خان کی بھی شرکت

میئر لندن کا کہنا ہے کہ نوجوانوں بالخصوص کم عمر لڑکوں میں بڑھتے ہوئے موٹاپے کو کنٹرول کرنے لیے سخت اقدامات ضروری ہیں، ہم چاہتے ہیں کہ بچوں اور ان کے اہل خانہ کو جنک فوڈ اور ان جیسے دیگر مضر صحت کھانوں کے نقصانات سے آگاہی فراہم کریں اور انہیں بتائیں کہ کھانے پینے کی وہ کونسی اشیا ہیں جو موٹاپے کا سبب بن رہی ہیں۔

میئر لندن کا کہنا ہے کہ بچوں میں موٹاپے کے حوالے سے لندن یورپ کا بدترین شہر ہے موٹاپے کی وجہ سے بچوں کی صحت کے ساتھ ساتھ شخصیت پر بھی منفی اثرات مرتب ہورہے ہیں اس لیے وہ سمجھتے ہیں کہ اشتہارات پر پابندی کے ذریعے موٹاپے میں کمی لائی جاسکتی ہے۔