امریکی سفارتکار کی روانگی جاں بحق عتیق کے والد نے صلح کی تردید کردی

40 لاکھ روپے اور ایک بچے کو نوکری کی پیشکش کی گئی تھی، والد ادریس بیگ

ویب ڈیسک May 14, 2018

40 لاکھ روپے اور ایک بچے کو نوکری کی پیشکش کی گئی تھی، والد ادریس بیگ (فوٹو: انٹرنیٹ)

امریکی سفارتکار کی گاڑی سے ہلاک ہونے والے شہری عتیق کے والد نے کرنل جوزف کے معاملے میں صلح ہونے یا دیت کی رقم لینے کی تردید کردی۔

ایکسپریس نیوز کے مطابق جاں بحق شہری عتیق کے والد ادریس بیگ نے کہا ہے کہ کرنل جوزف کے معاملے پر کوئی بات چیت نہیں ہوئی، ہماری بات چیت اپنی حکومت کے ساتھ چل رہی ہے اور اب معاملہ اللہ کی ذات پر چھوڑ دیا ہے۔

یہ پڑھیں: پاکستانی شہری کو کچلنے والا امریکی سفارتکار کرنل جوزف امریکا روانہ

انہوں نے بتایا کہ معاملے کے آغاز میں امریکا کی جانب سے ورثا کو 40 لاکھ روپے اور ایک بچے کو نوکری کی پیشکش کی گئی تھی لیکن ہم نے پیشکش قبول کرنے سے انکار کردیا تھا۔

اس ضمن میں ذرائع کا کہنا ہے کہ یہ پیشکش امریکی سفارت خانے کی جانب سے ادریس بیگ کو حادثے کے چوتھے دن کی گئی تھی تاہم مرحوم عتیق کے والد نے ابتداء میں کسی قسم کی دیت لینے سے انکار کیا تھا جس کے بعد مختلف چینلز کے ذریعے عتیق کے ورثا سے صلح کی کوششیں جاری رہیں۔

بعدازاں عتیق کے والد نے کرنل جوزف کے خلاف ہائی کورٹ میں درخواست دائر کردی تھی کہ ملزم کے خلاف کارروائی کرتے ہوئے نام ای سی ایل میں ڈالا جائے تاکہ وہ ملک سے باہر نہ جاسکے تاہم حکومت کی جانب سے امریکی ملٹری اتاشی کرنل جوزف کو سفارتی استثنیٰ دے دیا گیا جس کے بعد وہ فوری طور پر امریکا روانہ ہوگئے۔