آصف زرداری نےکراچی کو'کرچی کرچی' کر دیا ان کا احتساب کب ہوگا، شہباز شریف

ویب ڈیسک  منگل 22 مئ 2018
نیازی صاحب نے 5 سال میں خیبرپختونخوا کو تباہ کر دیا، شہباز شریف۔ فوٹو : فائل

نیازی صاحب نے 5 سال میں خیبرپختونخوا کو تباہ کر دیا، شہباز شریف۔ فوٹو : فائل

اوکاڑہ: مسلم لیگ (ن) کے صدر اور وزیر اعلیٰ پنجاب شہباز شریف کا کہنا ہے کہ عمران خان نے خیبرپختونخوا کو تباہ جب کہ آصف زرداری نے کراچی کو “کرچی کرچی” کردیا تو ان کا احتساب کب ہوگا۔

اوکاڑہ میں جلسہ عام سے خطاب کرتے ہوئے شہباز شریف کا کہنا تھا کہ ہم نے خدمت کے جھنڈے گاڑے، پنجاب میں 100 نہیں ایک ہزار کام کیے ہیں، عمران خان 100 دن کا ایجنڈا دے کر عوام کو بے وقوف نہیں بنا سکتے،انہوں نے 5 سال میں خیبر پختونخوا  کو تباہ کردیا لہذا نیب کو اس حوالے سے پوچھنا چاہیے۔ انہوں نے کہا کہ آصف زرداری نے کراچی کو کرچی کرچی کر دیا اور کئی سو ارب روپے ہڑپ کرلیے، ان کا احتساب کب ہوگا جب کہ کچھ لوگ گالی گلوچ اور دھرنے دیتے رہے اور ہم دن رات کام کرتے رہے،عوام گالی گلوچ کرنے والوں سے نفرت کررہے ہیں۔

شہباز شریف نے کہا کہ عوام کو جھوٹ اور الزامات میں تمیز کرنے سے قائد کا پاکستان بنے گا، اچھے کام کی تعریف اور خراب کام پر پکڑ ہونی چاہیے، نیب آئینی ادارہ ہے اور شفاف احتساب اس کا کام ہے لہذا نیب بلاتفریق احتساب کرے جب کہ پارٹی چھوڑنے والوں کے لیے دعاکرتا ہوں کہ اللہ انہیں ہدایت دے۔

شہباز شریف نے آصف زرداری اور عمران خان پر لکھی نظم پڑھتے ہوئے کہا کہ؛

دنیا میں پنجاب کا نام ہوا
جھوٹا نیازی کا ہر الزام ہوا
زرداری بری طرح ناکام ہوا
ہم نے خدمت کے جھنڈے گاڑے
پنجاب کی ترقی کو مانا زمانہ
اب ڈھونڈے گا نیازی کوئی اور بہانہ
سچی عزت ملتی ہے صرف کام سے
کچھ نہیں ہوتا نیازی کے الزام سے                                                                                                                                                                    دکھا کر تماشا مداری گئے                                                                                                                                                                                  نیازی اور آصف زرداری گئے



ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔