انتخابات کے دوران پولنگ عملے کی چھٹیوں اور فون بند کرنے پر پابندی

قیصر شیرازی  ہفتہ 7 جولائی 2018
بخار، کھانسی سردرد کی بنیاد پر چھٹی نہیں ملے گی، فون نہ سننے پر11افسروں کی سرزنش۔ فوٹو: فائل

بخار، کھانسی سردرد کی بنیاد پر چھٹی نہیں ملے گی، فون نہ سننے پر11افسروں کی سرزنش۔ فوٹو: فائل

راولپنڈی: الیکشن کمیشن کی سخت ہدایات پر ریٹرننگ افسران نے الیکشن ڈیوٹی کے بارے میں ہائی الرٹ جاری کر دیا، جس کے تحت تمام پولنگ افسران، اسسٹنٹ پولنگ افسران سمیت تمام ملازمین کی چھٹیوں پر پابندی عائد کر دی۔

الیکشن کمیشن کی جانب سے ڈیوٹی افسران، ملازمین کو پولنگ کی تاریخ 25 جولائی تک موبائل فون24 گھنٹے آن رکھنے اور اٹینڈ کرنے کے بھی سخت احکام جاری کیے گئے ہیں جب کہ بخار، کھانسی، سر درد کی بنیاد پر چھٹی نہیں دی جائے گی، صرف سنگین معاملہ ہارٹ اٹیک، زچگی اور ٹریفک حادثے کی بنیاد پر چھٹی دی جائے گی یا جس ملازم کی 25 جولائی کو شادی ہے وہ شادی دستاویز کے ساتھ چھٹی لے سکے گا۔

ریٹرننگ افسران نے موبائل فون آن رکھنے اور اٹینڈ کرنا لازمی قرار دینے پر خود افسران کو فون کر کے ان کی مانیٹرنگ بھی شروع کر دی، ضلع راولپنڈی میں فون اٹینڈ نہ کرنے والے 11 افسران کی سخت سرزنش کرتے ہوئے انھیں آئندہ محتاط رہنے کی وارننگ بھی جاری کر دی گئی۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔