بنگلہ دیشی کرکٹرز بورڈ کے قابو سے باہر ہونے لگے

اسپورٹس ڈیسک  اتوار 29 جولائ 2018
سوشل میڈیا پرگالم گلوچ،حکام نے واقعے کانوٹس لیتے ہوئے تحقیقات شروع کر دیں۔ فوٹو : فائل

سوشل میڈیا پرگالم گلوچ،حکام نے واقعے کانوٹس لیتے ہوئے تحقیقات شروع کر دیں۔ فوٹو : فائل

ڈھاکا: بنگلہ دیشی کرکٹرز بورڈ کے قابو سے باہر ہونے لگے، جھگڑالو صابر رحمان نے ویسٹ انڈیز سے دوسرے میچ میں شکست پر مذاق کرنے والے شائق سے سوشل میڈیا پر ہی گالم گلوچ شروع کردی، وطن واپسی پر ’سبق‘ سکھانے کی دھمکی بھی دے دی۔

بنگلہ دیشی کرکٹرز حالیہ عرصے میں مسلسل تنازعات کا شکار ہو رہے ہیں، اب صابر رحمان نے شائقین کو سوشل میڈیا پر بھی دھمکیاں دینا شروع کردیں، ویسٹ انڈیز سے دوسرے ون ڈے کے آخری اوور میں شکست پر ایک شائق نے فیس بک پر مذاق کرتے ہوئے  لکھا کہ ’معلوم نہیں کہ جناب ڈونلڈ صابر رحمان بریڈمین اس وقت پراسرار طور پر کیا سوچ رہے تھے، جس پر تین گھنٹوں بعد نہ صرف مذکورہ شائقین کو ان باکس میں صابر نے گالیاں دیں بلکہ دھمکی دی کہ وطن واپس آکر وہ ان سے نمٹ لیں گے، ساتھ میں اکاؤنٹ بھی بلاک کردیا۔

دوسری جانب بورڈ کے چیف ایگزیکٹیو نظام الدین چوہدری کا کہنا ہے کہ پلیئرز کیلیے سوشل میڈیا گائیڈ لائن موجود اور اس کے خلاف کچھ ہوا توکارروائی ہوگی، اس حوالے سے تحقیقات شروع کردی گئی ہیں۔ انھوں نے کہاکہ کرکٹرز پر یہ بات بھی واضح کی جا چکی ہے کہ انھیں سوشل میڈیا اور عوامی فورم پر بات کرتے ہوئے محتاط رہنا چاہیے، اگر صابر نے ایسی کوئی حرکت کی تو پھر ان کا کیس بھی ڈسپلنری کمیٹی کو بھیجا جائے گا اور مناسب کارروائی ہوگی۔

واضح رہے کہ مذکورہ شائق نے صابر کی جانب سے دی جانے والی دھمکی کا اسکرین شاٹ بھی میڈیا میں پیش کیا ہے۔ اس سے قبل 2016 میں بنگلہ دیش پریمیئر لیگ کے دوران ایک لڑکے کو تھپڑ مارنے پر ان کا سینٹرل کنٹریکٹ منسوخ کرنے کے ساتھ 25 ہزار ڈالر جرمانہ بھی کیا گیا تھا،وہ ڈسپلنری خلاف ورزی پر ایک بار 15 ہزار ڈالر جرمانہ بھی بھگت چکے ہیں۔

 

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔