پرابھاس نے فلم ’’پدماوت‘‘ میں کام کی آفر کیوں ٹھکرائی؟

ویب ڈیسک  منگل 14 اگست 2018
شاہد کپور سے قبل پرابھاس کو فلم ’پدماوت‘ میں راجا راوال رتن سنگھ کے کردار کی آفر ہوئی تھی۔

شاہد کپور سے قبل پرابھاس کو فلم ’پدماوت‘ میں راجا راوال رتن سنگھ کے کردار کی آفر ہوئی تھی۔

 ممبئی: بھارت کی متنازع فلم ’پدماوت‘ میں راجا راوال رتن سنگھ کے کردار کے لئے شاہد کپور سے قبل پرابھاس کو آفر کی گئی تھی مگر انہوں نے یہ آفر ٹھکرادی۔ 

بھارتی تاریخ کی سب سے زیادہ متنازع فلم ’پدماوت‘ اپنے بننے سے ریلیز ہونے تک مختلف تنازعات کا شکار رہی لیکن اس کے باجود فلم شائقین کو نہ صرف متاثر کرنے میں کامیاب رہی بلکہ باکس آفس پر بھی 300 کروڑ سے زائد کا بزنس کیا فلم کے حوالے سے ایک نیا انکشاف سامنے آیا ہے کہ ’پدماوت‘ میں راجا راوال رتن سنگھ کے کردار کے لئے شاہد کپور سے قبل فلم ’باہو بالی‘ کے ہیرو پرابھاس کو آفر کی گئی تھی۔

بھارتی میڈیا رپورٹس کے مطابق فلم ’باہو بالی‘ میں پرابھاس کی متاثرکن اداکاری کے بعد انہیں بالی ووڈ سے کئی فلمسازوں کی طرف سے آفرز آئی لیکن انہوں نے شردھا کپور کے ساتھ فلم ’ساہو‘ کو ترجیح دی حالانکہ انہیں نامور ہدایت کار سنجے لیلا بھنسالی کی فلم ’پدماوت‘ میں دپیکا پڈوکون کے مدمقابل کردار کی آفر ہوئی تھی لیکن انہوں نے انکار کردیا تھا۔

پرابھاس کے قریبی ذرائع کا کہنا ہے کہ جب پربھاس نے فلم کی کہانی سننے کے بعد کردار کی وسعت کا اندازہ لگایا تو انہوں نے بھنسالی کے اس پروجیکٹ کو نہ کرنا ہی بہتر سمجھا۔

یہ خبر بھی پڑھیں: فلم ’پدماوت‘ دپیکا سے پہلے مجھے آفر کی گئی تھی،ایشوریا کا انکشاف

ذرائع نے مزید انکشاف کیا کہ پرابھاس کا فلم نہ کرنے کی ایک وجہ یہ بھی تھی کہ راجا رتن سنگھ کا کردار بہت اہم نہیں تھا اور فلم ’باہو بالی‘ میں پانچ سال مسلسل محنت کرنے کے بعد حاصل کردہ شہرت کو یہ کردار نقصان پہنچا سکتا تھا کیوں کہ وہ ایسا رول کرنا ہی نہیں چاہتے تھے کہ جو مرکزی کردار سے کم ہو اس لئے انہوں نے فلم کرنے سے انکار کیا۔



ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔