آشیانہ کرپشن کیس؛ مسلم لیگ (ن) کے صدر شہباز شریف نیب میں پیش

لاہور: سابق وزیراعلیٰ پنجاب شہباز شریف آشیانہ کرپشن اور پاور ڈویلپمنٹ کمپنی کیس میں نیب میں پیش ہوگئے۔

ایکسپریس نیوزکے مطابق مسلم لیگ (ن) کے صدرشہبازشریف نیب آفس میں پیشی کے بعد روانہ ہوگئے ہیں۔ انہیں نیب نے پاور ڈویلپمنٹ کمپنی کیس اور آشیانہ کیس میں تحقیقات کے لیے بھی طلب کررکھا تھا۔ شہبازشریف کافی دیر تک نیب آفس لاہورمیں موجود رہے جہاں ان سے تقریباً پونے 2 گھنٹے تک تفتیش کی گئی۔

اس خبرکوبھی پڑھیں: شہباز شریف آشیانہ کرپشن کیس میں طلب

واضح رہے کہ سابق وزیراعلیٰ پنجاب شہباز شریف پر الزام ہے کہ انہوں نے مستحق ٹھیکیدار چوہدری لطیف کا ٹھیکہ منسوخ کرکے لاہور کاسا کو ٹھیکہ نوازا جس سے قومی خزانے کو 19 کروڑ 30 لاکھ روپے نقصان پہنچا جب کہ آشیانہ اقبال کا ٹھیکہ ایل ڈی اے کو دینے سے قومی خزانے کو 71 کروڑ 50 لاکھ روپے کا نقصان ہوا۔