شاہ رخ، سلمان اور کترینہ بنیں گے کرن جوہر کے مہمان

ویب ڈیسک  پير 20 اگست 2018
 ٹاک شو ’کافی ود کرن‘ کا نیا سیزن 21 اکتوبر کو 9 بجے دیکھا جا سکے گا۔ فوٹو: فائل

ٹاک شو ’کافی ود کرن‘ کا نیا سیزن 21 اکتوبر کو 9 بجے دیکھا جا سکے گا۔ فوٹو: فائل

 ممبئی: کرن جوہر کے مشہور ٹاک شو’کافی ود کرن ‘ کے سیزن 6 میں  شاہ رخ خان ،سلمان خان اور کترینہ کیف شو کے مہمان بنیں گے۔

بالی ووڈ کے معروف فلمساز اور ہدایت کار کرن جوہر فلم نگری کے ساتھ ساتھ  مشہور ٹاک شو ’کافی ود کرن ‘ کی وجہ سے بھی  شہرت رکھتے ہیں۔

ان کے شو کی مقبولیت کو چار چاند لگانے میں بالی ووڈ اداکاروں کا ہی ہاتھ ہے کیوں کہ اس شو میں اداکاروں کی کہی ان کہی باتیں اور بہت سے راز خبروں کی زینت بن جاتے ہیں یہی وجہ ہے کہ شو کے چھٹے سیزن میں کنگ خان، بالی ووڈ سلطان اور باربی ڈول بطور پہلے مہمان شرکت کریں گے۔

بھارتی میڈیا رپورٹس کے مطابق  شو کے میزبان کرن جوہر ٹاک شو کے نئے سیزن کے پہلے پروگرام میں  فلم دھڑک کے اسٹار جھانوی کپور، ایشان کھتر کے ساتھ انوشکا اور ویرات  کو مدعو کرنا چاہتے تھے تاہم اب انہوں نے شاہ رخ، سلمان اورکترینہ کو بلانے کا فیصلہ کیا ہے۔

نئے شو کے چھٹے سیزن میں شاہ رخ خان ، سلمان خان اور کترینہ کیف پہلی بار ایک ساتھ  نظر آئیں گے جوکہ فلم ’زیرو‘ میں بھی کام کر رہے ہیں۔

واضح رہے کہ کرن جوہر نے گزشتہ روز سماجی رابطے کی سائٹ ٹوئٹر پر اعلان کیا تھا کہ ٹاک شو ’کافی ود کرن‘ کا نیا سیزن 21 اکتوبر کو 9 بجے دیکھا جا سکے گا۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔