ملائیشیا میں 12 ملین ڈالر کی مالیت کے گینڈے کے سینگ ضبط

ویب ڈیسک  بدھ 22 اگست 2018
کارگو ٹرمینل پر ویت نام بھیجوائے جانے والے سامان سے گینڈے کے 50 سینگ برآمد ہوئے۔ فوٹو: اے ایف پی

کارگو ٹرمینل پر ویت نام بھیجوائے جانے والے سامان سے گینڈے کے 50 سینگ برآمد ہوئے۔ فوٹو: اے ایف پی

کوالا لمپور: کوالالمپور ایئرپورٹ پر نادر و نایاب گینڈے کی نسل کے 50 سینگوں کی اسمگلنگ کو ناکام بنا دیا گیا۔

بین الاقوامی خبر رساں ادارے کے مطابق ملائیشیا کے کوالالمپور ایئرپورٹ کے کارگو ٹرمینل پر ویت نام بھیجے جانے والے سامان میں خفیہ طور پر چھپائے گئے گینڈے کی نادر نسل کے 50 سینگوں کو ضبط کر لیا گیا ہے جس کی مالیت 12 ملین ڈالر ہے۔

ملائیشیا کے وائلڈ لائف ادارے کے سربراہ عبدالقادر ابو ہاشم نے میڈیا کو بتایا کہ ویت نام بھیجے جانے والے سامان سے برآمد ہونے والے 50 سینگوں کا وزن 116 کلو گرام ہے جس کی مالیت 12 ملین امریکی ڈالر ہے اور یہ اب تک ملائیشیا میں پکڑے جانے والے گینڈے کے سینگوں کی سب سے بڑی کھیپ ہے۔

ایئرپورٹ انتظامیہ نے ضبط کیے گئے سامان کو بھیجوانے والے شخص سے متعلق تحقیقات کا آغاز کردیا ہے۔ یہ سامان ایک کمپنی کی جانب سے بک کروایا گیا تھا تاہم ابھی تک کوئی گرفتاری عمل میں نہیں لائی گئی ہے۔

واضح رہے کہ دنیا بھر میں گینڈوں کے سینگوں کی فروخت پر 1977 سے پابندی عائد ہے اس کے باوجود قیمتی سینگوں کی خرید و فروخت جاری ہے۔ ویت نام گینڈے کی سینگوں کی سب سے بڑی مارکیٹ ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔