سلیکشن میٹنگ واٹمورکے سواکسی نے یونس کیلیے آواز نہ اٹھائی

کراچی: یونس خان کا ون ڈے انٹرنیشنل کیریئر مایوس کن انداز میں ممکنہ اختتام کو پہنچ گیا،لاہور میں میٹنگ کے دوران کوچ ڈیو واٹمور کے سواکسی نے بھی تجربہ کار بیٹسمین کے حق میں آواز نہ اٹھائی،ذرائع کا کہنا ہے کہ نائب کپتان محمد حفیظ اس دوران خاموش تماشائی بنے بیٹھے رہے۔

تفصیلات کے مطابق بطور کپتان آئی سی سی سی ورلڈ ٹوئنٹی20میں فتح کے بعد یونس خان نے جب اس طرز کی کرکٹ کو خیرباد کہا تو بعد میں واپسی کی کئی کوششیں ان کے کام نہ آ سکیں،ون ڈے میں یونس کی سست بیٹنگ پر اکثر تنقید ہوتی رہی جو گذشتہ برس بھارت کیخلاف ورلڈکپ سیمی فائنل کی اننگز کے بعد بڑھ گئی، اس طرز میں انھوں نے آخری سنچری 16 نومبر 2008 میں ویسٹ انڈیز کیخلاف ابوظبی میں بنائی تھی، اس کے بعد67 میچز میں26.20 کی اوسط سے محض1546 رنز اسکور کیے،آخری 10 میچز میں وہ صرف ایک نصف سنچری کی مدد سے97 رنز ہی بنا پائے، اوسط 10.77 رہی، رواں برس سری لنکا سے میچز کو ان کے کیریئر کیلیے خاصا اہم قرار دیا گیا۔

مگر وہ4 میں سے کسی بھی میچ میں ڈبل فیگر میں بھی داخل نہ ہو سکے اور3.33 کی ایوریج سے10 رنز بنائے۔ ایسے میں انھیں ڈراپ کرنے کا فیصلہ ذرا بھی دشوار نہ تھا، ذرائع نے بتایاکہ پیر کو لاہور میں جب پی سی بی آفیشلز کے سامنے سلیکٹرز نے یونس خان کو ذراپ کرنے کا ذکر چھیڑا تو صرف کوچ ڈیو واٹمور نے ہی اس کی مخالفت کی، ان کا کہنا تھا کہ ابھی تجربہ کار کھلاڑی کی ٹیم کو ضرورت ہے، ایسے میں سلیکٹرز نے جب اعدادوشمار سامنے رکھے تو کوچ بھی چپ ہوگئے۔ میٹنگ میں موجود نائب کپتان محمد حفیظ نے اپنے سینئر ساتھی کے حق میں دو بول کہنا بھی گوارا نہ سمجھا۔

قبل ازیں گذشتہ دنوں سری لنکا روانگی سے قبل جب مصباح الحق سے اس بابت پوچھا گیا تو انھوں نے بھی یونس کی شمولیت پر اصرار نہیں کیا تھا، یوں متفقہ رائے سے یونس کے کیریئر پر فل اسٹاپ لگانے کا فیصلہ ہوا، ذرائع کے مطابق اگلی ٹیسٹ سیریز ان کے اس طرز میں بھی مستقبل کا فیصلہ کرے گی۔ یاد رہے سری لنکا کیخلاف میچز سے قبل بھی سینئر بیٹسمین کو باہرکرنے کی تجویز سامنے آئی تھی جس پر واٹمور کی مخالفت کے سبب عمل نہیں کیا گیا تھا۔ ’’ایکسپریس‘‘ نے13جون کی اشاعت میں ہی یونس کے ڈراپ ہونے کے حوالے سے خبرشائع کی تھی۔