ٹریفک حادثات اور کرنٹ لگنے سے خاتون سمیت4افراد ہلاک

کراچی:  شہر میں مختلف ٹریفک حادثات اور کرنٹ لگنے کے واقعات کے دوران خاتون سمیت4 افراد ہلاک اور 5 افراد زخمی ہو گئے۔

تفصیلات کے مطابق ملیر میمن گوٹھ کے علاقے میں تیز رفتار ٹرک کی ٹکر سے 25 سالہ خاتون لال بی بی زوجہ شفیق ہلاک ہو گئی جن کی لاش ضابطے کی کارروائی کے لیے جناح اسپتال لائی گئی تاہم ورثا نے پولیس کو کارروائی کرنے سے منع کردیا جس پر پولیس نے لاش ورثا کے حوالے کردی، گڈاپ سٹی تھانے کی حدود میں سپر ہائی وے پر سڑک عبور کرتے ہوئے15سالہ نوجوان ہیرا ولد گلار تیز رفتار کار رجسٹریشن نمبرAWQ-143 کی ٹکر سے ہلاک ہو گیا جبکہ کار میں سوار شخص موقع کا فائدہ اٹھاتے ہوئے فرار ہونے میں کامیاب ہو گیا ، مذکورہ کار پولیس نے تحویل میں لے لی ہے۔

ہلاک ہونے والا نوجوان دنبہ گوٹھ کا رہائشی تھا اور مزدوری کر کے واپس آرہا تھا کہ حادثے کا شکارہ ہوگیا ، میانوالی کالونی میں اے ون ماربل فیکٹری کے قریب ٹرک سے گرنے والے بھاری پتھر کے نیچے دب نے سے فیکٹری کا چوکیدار 40 سالہ گل رحمن ولد مرزا گل ہلاک ہو گیا۔

پولیس کے مطابق واقعہ اتفاقیہ پیش آیا ہے لواحقین نے کسی قسم کی کارروائی نہیں کرائی جس پر متوفی کی لاش ورثا کے حوالے کردی گئی، الآصف اسکوائر کے قریب کام کے دوران کرنٹ لگنے سے 25 سالہ فرحان ولد شیر جان ہلاک ہو گیا جس کی لاش ضابطے کی کارروائی کے لیے عباسی شہید پہنچائی گئی۔

ورثا اسپتال سے لاش بغیر کارروائی کرائے اپنے ہمراہ لے گئے، عبداﷲ کالج کے قریب رکشا الٹنے سے 35 سالہ نعیم ولد دلشاد اور امجد ولد رشید، گلبہار میں نامعلوم گاڑی کی ٹکر سے امجد ولد شریف اور حیدر ی مارکیٹ کے قریب ٹریفک حادثے میں نارتھ ناظم آباد بلاک این کی رہائشی شبانہ دختر عبدالرئوف زخمی ہو گئی، علاوہ ازیں لیاری آگرا تاج کالونی میں واقع غوثیہ روڈ گلی نمبر 6 میں واقع مکان میں 44 سالہ عابد ولد مٹھو نے گلے میں پھندا لگا کر خود کشی کرلی، عابدکی لاش ضابطے کی کارروائی کے لیے سول اسپتال پہنچائی گئی تاہم ورثا پولیس کارروائی کے بغیر لاش اسپتال سے لے گئے، پولیس کے مطابق متوفی گھانچی قوم سے تعلق رکھتا ہے اور متوفی کا ذہنی توازن بھی درست نہیں تھا۔