لال مسجد آپریشن؛اسلام آباد ہائی کورٹ میں پرویز مشرف پر قتل کے مقدمے کی درخواست دائر

ویب ڈیسک  پير 27 مئ 2013
غازی عبدالرشید کے صاحبزادے ہارون رشید نے طارق اسد ایڈووکیٹ کی وساطت سے اسلام آباد ہائی کورٹ میں درخواست دائر کی ہے فوٹو فائل

غازی عبدالرشید کے صاحبزادے ہارون رشید نے طارق اسد ایڈووکیٹ کی وساطت سے اسلام آباد ہائی کورٹ میں درخواست دائر کی ہے فوٹو فائل

اسلا م آباد: ہائی کورٹ میں سابق صدر پرویز مشرف کے خلاف لال مسجد آپریشن کیس میں نائب خطیب عبدالرشید اور ان کی والدہ کے قتل کا مقدمہ درج کرانے کے لئے درخواست دائر کردی گئی ہے۔

لال مسجد کے خطیب غازی عبدالرشید کے صاحبزادے ہارون رشید نے طارق اسد ایڈووکیٹ کی وساطت سے اسلام آباد ہائی کورٹ میں درخواست دائر کی ہے، درخواست میں موقف اختیار کیا گیا ہے کہ 2007 میں اسلام آباد کی لال مسجد میں ہونے والے آپریشن میں اس وقت کے صدر مملکت اور آرمی چیف جنرل ریٹائرڈ پرویز مشرف ملوث تھے لیکن میڈیا میں اس بات کا خدشہ ظاہر کیا جارہا ہے کہ پرویز مشرف کو بیرون ملک بھجوا دیا جائے گا ، اس لئے عدالت عالیہ سے درخواست ہے کہ لال مسجد آپریشن کیس کی سماعت جلد سے جلد کی جائے اور اس آپریشن کے دوران ہلاک ہونے والے نائب خطیب عبد الرشید اور ان کی ضعیف والدہ کے قتل کا مقدمہ سابق صدر پرویز مشرف کے خلاف درج کیا جائے۔

واضح رہے کہ سپریم کورٹ کے حکم پر لال مسجد آپریشن پر ایک جوڈیشل کمیشن بھی قائم کیا گیا تھا جس نے مختلف اہم شخصیات کے بیانات اور دیگر شواہد کی روشنی میں اپنی رپورٹ سپریم کورٹ کو پیش کردی ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔