پی ایس ایل فور کا 14 فروری سے آغاز، فائنل کراچی میں ہوگا 

اسپورٹس ڈیسک  ہفتہ 15 ستمبر 2018
ایونٹ کے زیادہ تر میچز یو اے ای میں ہوں گے جب کہ فائنل سمیت 8 میچز پاکستان میں ہوں گے۔

ایونٹ کے زیادہ تر میچز یو اے ای میں ہوں گے جب کہ فائنل سمیت 8 میچز پاکستان میں ہوں گے۔

 کراچی: پاکستان سپرلیگ  فور کا آغاز 14 فروری سے دبئی میں ہوگا جب کہ 17 مارچ کو کراچی میں فائنل سمیت 8 میچز پاکستان میں ہوں گے۔

ایکسپریس نیوز کے مطابق پاکستان سپرلیگ کی گورننگ کونسل کا اجلاس نیشنل کرکٹ اکیڈمی میں ہوا۔ چیئرمین پی سی بی احسان مانی کی صدارت میں ہونے والے اجلاس میں فیصلہ کیا گیا کہ پی ایس ایل کی افتتاحی تقریب 14 فروری کو دبئی میں ہوگی۔

اجلاس میں آخری 8 میچز پاکستان کے مختلف شہروں میں کرانے پر اتفاق کیا گیا جب کہ فائنل 17 مارچ کو شہر قائد میں رکھا گیا ہے۔ کھلاڑیوں کا ڈرافٹ پرانے طریقہ کار کے تحت اکتوبر کے آخری ہفتے ہوگا، ،ہر فرنچائز ٹیم کو زیادہ سے زیادہ 10 کھلاڑی برقرار رکھنے کی اجازت ہوگی۔

بورڈ کے سربراہ نے فرنچائزز کو یقین دلایا کہ معاملات کو شفاف رکھتے ہوئے باہمی تعاون کی فضا سے ایونٹ کو مزید کامیاب بنایا جائے گا، میڈیا رائٹس کی فروخت کیلیے بڈز کے عمل میں فرنچائزز کے نمائندے بھی کمیٹیز میں شامل ہوں گے۔ گورننگ کونسل کے ارکان نے احسان مانی کو چیئرمین پی سی بی کا عہدہ سنبھالنے پر مبارکباد دیتے ہوئے ہر ممکن تعاون کا یقین دلایا۔



ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔