نواز شریف اور شہباز شریف لاہور کے علاوہ دیگر علاقوں سے جیتی نشستوں سے دستبردار

قانون کے مطابق رکن قومی اورصوبائی اسمبلی کو ایک کے علاوہ دیگر جیتی ہوئی نشستوں سے دستبردار ہونا ہوتا ہے

ویب ڈیسک June 01, 2013

نامزد وزیراعظم نوازشریف نےلاہور کی نشست این اے 120 اپنے پاس رکھی جبکہ این اے 68 سرگودھا کی نشست چھوڑدی ہے فوٹو : فائل

مسلم لیگ (ن) کے صدر نوازشریف، شہباز شریف اورحمزہ شہباز لاہور کےعلاوہ دیگر علاقوں سے جیتی نشستوں سے دستبردار ہوگئے۔

11 مئی کو ہونے والے انتخابات میں کئی امیدوار قومی اور صوبائی اسمبلیوں کی ایک سے زائد نشست پر کامیاب ہوئے جنہیں قانون کے مطابق ایک کے علاوہ دیگر تمام نشستوں سے دستبردار ہونا ہوتا ہے، شریف خاندان کے 3 افراد ایک سے زائد نشستوں پر کامیاب ہوئے ہیں تاہم انہوں نے لاہور کے علاوہ دیگر علاقوں سے جیتی ہوئی نشستیں چھوڑدیں ہیں۔ نامزد وزیراعظم نواز شریف نے لاہور کی نشست این اے 120 اپنے پاس رکھی جبکہ این اے 68 سرگودھا کی نشست چھوڑدی ہے، شہباز شریف نے این اے 129، پی پی 159 لاہور اور پی پی 247 راجن پور کی نشست چھوڑی ہے تاہم انہوں نے پی پی 161 لاہور کی نشست پر حلف اٹھایا۔

عمران خان نے این اے 56 راولپنڈی کی نشست اپنے پاس رکھنے کا فیصلہ کیا ہے، انہوں نے این اے ون پشاور اور این اے 71 میانوالی کی نشست چھوڑدی ہے۔ مسلم لیگ فنکشنل کے پیر صدرالدین شاہ راشدی این اے 235 سانگھڑ سے دست بردار ہوگئے ہیں۔ خیبرپختونخوا کے نو منتخب وزیر اعلیٰ پرویز خٹک نے این اے 5 نوشہرہ، اسد قیصر نے این اے 13 صوابی اور امیر حیدر ہوتی نے پی کے 23 مردان کی نشست چھوڑدی ہے۔

چوہدری نثار علی خان پی پی 6 راولپنڈی، خواجہ آصف پی پی 123 سیالکوٹ اور حمزہ شہبازشریف پی پی 142 لاہور سے دست بردار ہوگئے ہیں۔ مونس الہیٰ نے پی پی 118 منڈی بہاؤالدین، مخدوم خسرو بختیار نے پی پی 289 رحیم یارخان اور مخدوم سید مصطفیٰ محمود نے پی پی 295 رحیم یارخان کی نشست چھوڑدی ہے۔ مولانا محمد شیرانی رکن قومی اسمبلی کا حلف اٹھاکر سینیٹ کی نشست سے دستبردار ہوگئے ہیں تاہم مخدوم شاہ محمود قریشی، مولانا فضل الرحمان اور جمشید دستی نے اپنی چھوڑی ہوئی نشستوں کے بارے میں الیکشن کمیشن کو تاحال آگاہ نہیں کیا۔