امریکا تعلیمی شعبے میں تعاون جاری رکھے گا، مائیکل ڈوڈمین

کراچی:  کراچی میں امریکی قونصل جنرل مائیکل ڈوڈمین نے کہا ہے کہ پاکستان کے روشن اور بہتر مستقبل کے لیے امریکا تعلیم کے شعبے میں تعاون جاری رکھے گا ۔

وہ گزشتہ روز یو ایس ایڈ پروگرام کے تحت گریجویٹس میں ڈگری اور طلبا میں اسکالر شپ تقسیم کرنے کی تقریب سے خطاب کررہے تھے،مائیکل ڈوڈمین نے کہا کہ پاکستان اور امریکا کے درمیان تعلقات باہمی احترام پر قائم ہیں،قونصل جنرل کا کہنا تھا کہ پاکستانی عوام کو اعلیٰ تعلیم کی فراہمی ممکن بنانے کی کوشش کی جارہی ہے جس کے ذریعے وہ نہ صرف بہتر معاشی مواقع حاصل کرسکیں گے،انھوں نے پاکستانی نوجوانوں کی ترقی میں اہم کردار ادا کرنے پر اساتذہ کو مبارکباد پیش کی۔

تقریب میں امریکی ادارہ برائے بین الاقوامی ترقی (یو ایس ایڈ) کے تحت ٹیچر ایجوکیشن پروگرام کے تحت 210 طلبا میں اسکالر شپ تقسیم کی،تقریب میں ایسوسی ایٹ ڈگری ان ایجوکیشن (اے ڈی ای) اینڈ بیچلر آف ایجوکیشن (آنرز) ایلمینٹری مکمل کرنے والے63 اساتذہ میں بھی ڈگریاں تقسیم کی گئیں،طلبا کا تعلق کراچی سمیت سندھ بھر کی مختلف یونیورسٹیوں اور کالجوں سے ہے،اس موقع پر شرکا نے امید ظاہر کی کہ یہ اساتذہ نئی معلومات اور صلاحیتوں کے ذریعے طلبا کی بہتر رہنمائی کرسکیں گے۔

تقریب سے ایڈیشنل چیف سیکریٹری تعلیم فضل اللہ پیچوہو نے بھی خطاب کیا جبکہ مختلف یونیورسٹیوں کے وائس چانسلرز اور کالج پرنسپلز شریک تھے،تقریب کے دوران بہترین کارکردگی کا مظاہرہ کرنے والے ہر کالج کے ٹاپ تھری طلبا میں لیپ ٹاپ بھی تقسیم کیے گئے،یو ایس ایڈ کے تحت جاری کی جانے والی اسکالر شپس کی تعداد اب 400 ہوگئی ہے،یو ایس ایڈ کے ٹیچر ایجوکیشن پروجیکٹ کے ذریعے اساتذہ کی تربیت کے لیے ساڑھے7 کروڑ کی خطیر رقم مختص کی گئی ہے جس کے ذریعے جدید نصاب کی تیاری اور ملک بھر کے 1900 اساتذہ کے لیے اسکالر شپ فراہم کی جارہی ہیں۔