حکومت کو من مانی نہیں کرنے دیں گے، شہباز شریف

ویب ڈیسک  منگل 25 ستمبر 2018
ہمیں جمہوری، دستوری اور پارلیمانی اقدار کی ایک نئی طرح ڈالنی ہے، شہباز شریف فوٹو: فائل

ہمیں جمہوری، دستوری اور پارلیمانی اقدار کی ایک نئی طرح ڈالنی ہے، شہباز شریف فوٹو: فائل

 اسلام آباد: مسلم لیگ (ن) کے صدر اور قومی اسمبلی میں قائد حزب اختلاف شہباز شریف نے کہا ہے کہ منی بجٹ عوام سے دشمنی ہے اور ہم حکومت کو من مانی نہیں کرنے دیں گے۔

پارلیمنٹ ہاؤس اسلام آباد میں مسلم لیگ (ن) کی مشترکہ پارلیمانی پارٹی کا اجلاس ہوا جس میں پارٹی کی سینئر قیادت، سینیٹ اور قومی اسمبلی کے ارکان نے شرکت کی۔ اجلاس میں سیاسی صورتحال پر مشاورت اور مستقبل کی حکمت عملی طے کی گئی۔

اجلاس میں پبلک اکاؤنٹس کمیٹی اور مجالس قائمہ کے چیئرمین کے تقرر کے حوالے سے ناموں کو حتمی شکل دی گئی۔ اجلاس میں طے پایا کہ شہباز شریف آئندہ 3 ماہ تک پبلک اکاؤنٹس کمیٹی کے چیئرمین رہیں گے، جس کے بعد خواجہ آصف یا سردار ایاز صادق کو چیئرمین پی اے سی نامزد کیا جائے گا۔ قومی اسمبلی میں مسلم لیگ (ن) کے پارلیمانی لیڈر رانا تنویر ہوں گے۔

اجلاس کے دوران شہباز شریف نے کہا کہ ہمیں تنقید برائے تنقید اور اختلاف برائے اختلاف کے بجائے جمہوری،دستوری اور پارلیمانی قرینوں اور اقدار کی ایک نئی طرح ڈالنی ہے۔ قوم کا پارلیمنٹ پر اعتماد بڑھانا ہے۔ اپنے کرداراور عمل سے ثابت کرنا ہے کہ ہم بڑے دعوے نہیں کرتے بلکہ قوم کی امانت کی پوری دیانت داری اور خداخوفی سے حفاظت کرنے والے ہیں۔ ہم اب پارلیمنٹ کے اندر اور باہر ملک کے مفادات کے تحفظ کے لئے بھی بھرپورمحنت، جذبے اور دیانتداری سے کام کریں گے۔ منی بجٹ عوام سے دشمنی ہے، بجلی اور گیس کے بلوں میں اضافے سے عوام کی مشکلات میں اضافہ ہو گا،حکومت کو من مانی نہیں کرنے دیں گے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔