سندھ اسمبلی کے اجلاس میں اسپیکر اور ارکان کے درمیان گرما گرمی

اسٹاف رپورٹر  بدھ 26 ستمبر 2018
گرما گرمی کے باعث اپوزیشن جماعتوں نے علامتی واک آؤٹ کیا: فوٹو: فائل

گرما گرمی کے باعث اپوزیشن جماعتوں نے علامتی واک آؤٹ کیا: فوٹو: فائل

 کراچی: 

سندھ اسمبلی کے اجلاس میں اسپیکرآغا سراج درانی اور ارکان کے درمیان گرما گرمی دیکھنے میں آئی۔

سندھ اسمبلی کے اجلاس کے دوران بعض مواقعوں پر ارکان اور اسپیکر کے درمیان گرما گرمی دیکھنے میں آئی، نامزد اپوزیشن لیڈر فردوس نقوی نے اسپیکر کی اجازت کے بغیر بولنا چاہا تو اسپیکر نے انہیں اجازت نہیں دی اور کہا کہ بجٹ اجلاس کے دوران بات نہیں کرنے دونگا، اپوزیشن جماعتوں کے ایوان سے چلے جانے سے وقت ضائع ہوا۔

فردوس شمیم نقوی بولے کہ اسمبلی کا اجلاس ہی تاخیر سے شروع ہوتا ہے اس میں اپوزیشن جماعتوں کا قصورکیا ہے جسکے جواب میں اسپیکر نے کہا کہ کورم پورا ہو تو میں وقت پر اجلاس شروع کروں گا۔اراکین اسمبلی وقت پر نہیں آ تے تو اجلاس کیسے وقت پر شروع ہوگا؟ آج بھی پون گھنٹے تک ارکان کا انتظار کرتا رہا مگر مجبوراً کم ارکان کی موجودگی میں اجلاس شروع کیا۔

اجلاس شروع ہوتے ہی ایم کیوایم کے کنورنوید جمیل اور اسپیکر آغا سراج درانی کے درمیان بھی گرما گرمی ہوئی، جس پر اپوزیشن جماعتوں نے علامتی واک آؤٹ کیا۔ اجلاس کے دوران بجٹ پر اظہار خیال کرتے ہوئے حزب اقتدار اور حزب اختلاف کے ارکان کے درمیان جملوں کا تبادلہ ہوتا رہا۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔