امریش پوری نے 400فلموں میں اداکاری کی دھاک بٹھائی

کراچی:  بالی وڈ میں بہت کم اداکار ایسے ہوں گے کہ جنھیں منفی کرداروں میں اس قدر شہرت ملی ہو۔

عام طور سے منفی کردار عوام کو اس قدر متاثر نہیں کرتے لیکن بالی وڈ سپراسٹار امریش پوری ان خوش نصیب فنکاروں میں شامل تھے کہ جن کی فلمیںصرف فلم بین اس لیے دیکھتے تھے کہ وہ ہرنئی فلم میں ایک نئے روپ میں اور ایک نئے کردار میں نظر آتے تھے22جون1932کو پنجاب (بھارت) میں پیدا ہونیوالے ادکار امریش پوری نے 400سے زائد فلموں میں بطور ولن کردار ادا کرکے ایک نیا ریکارڈ قائم کیا اورہر فلم میں اپنے کردار کی دھاک بٹھائی ، ان کی فلموں میںکوئی بھی ایسے کردار نہیں تھا جو کسی اور سے ملتا جلتا ہوامریش پوری نے اپنے پورے کیرئیر جو بھی کردار ادا کیے وہ سب سب مختلف تھے۔

امریش پوری نے اپنے فنی سفرکا آغاز تھیٹر سے کیا وہ بنیادی طور پر تھیٹر کے فنکار تھے 1970میں ان کی فلم ’’پریم پجاری‘‘ریلیز کی گئی اور اس کے بعد ان کی کامیابی کا دور شروع ہوگیا،ان کی مشہور فلموں میں ’مسٹر انڈیا‘ جس میں ان کا مکالمہ ’موگیبو خوش ہوا ‘اس قدر ہٹ ہوا کہ وہ ہر محفل میں بولا جانے لگا،امریش پوری کی فلم ’میری جنگ،گھاتک، وراثت، گردش، کرن ارجن، دل والے دلہنیا لے جائیں گے،کوئلہ،بادشاہ، پریم پجاری، ریشماں اور شیرا، سلاخیں، قابل ذکر ہیں ۔

جب کہ انھوں نے ہالی ووڈ کے مشہور ڈائریکٹر اسپیل برگ کی فلم انڈیانا جونز میں بھی چونکا دینے والا کردار ادا کیا جو 1984میں ریلیز کی گئی،بھارتی فلموں کے یہ اسٹار اپنی زندگی کے آخر تک فلموں میں کام کرتے رہے وہ ایک بہترین انسان اور فلم انڈسٹری کی پسندیدہ شخصیات میں شمار کیے جاتے تھے ان کی فلموں کو بالی وڈ میں انسٹیٹیوٹ میں پیش کیا جاتا تھا اور لوگوں کو اداکاری کے رموز سے آگا ہ کیا جاتاہے، امریش پوری12جنوری2005کو 72سال کی عمر میں اس دنیا سے رخصت ہوگئے لیکن ان کے فلموں میں کیے گئے کردار ہمیشہ امر رہیں گے۔