حکومت برآمدات بڑھانے کیلیے ہراقدام پر تیار ہے، ممبر کسٹمز

2 ماہ میں ریبیٹ نظام خودکار ہو جائے گا، ایکسپورٹرز کو کسٹمز ہاؤس آنا نہیں پڑے گا، زاہد کھوکھر

اسٹاف رپورٹر ہفتہ 20 اکتوبر 2018

2 ماہ میں ریبیٹ نظام خودکار ہو جائے گا، ایکسپورٹرز کو کسٹمز ہاؤس آنا نہیں پڑے گا، زاہد کھوکھر۔ فوٹو: فائل

کراچی: پاکستان ممبر کسٹمز ایف بی آر زاہد کھوکھر نے کہا ہے کہ وفاقی حکومت ملکی برآمدات بڑھانے کیلیے ہرقسم کے اقدامات بروئے کار لانے کیلیے تیار ہے۔

پاکستان ہوزری مینوفیکچررز ایسوسی ایشن میں ویلیوایڈڈ ٹیکسٹائل سیکٹرکے برآمدکنندگان سے خطاب کے دوران ممبر کسٹمز ایف بی آر زاہد کھوکھر نے کہا ہے کہ ملک کیلیے برآمدات بڑھا کر زرمبادلہ کا حصول وقت کی اہم ضرورت ہے جبکہ وفاقی حکومت ملکی برآمدات بڑھانے کیلیے ہرقسم کے اقدامات بروئے کار لانے کیلیے تیار ہے۔

زاہد کھوکھر نے کہا کہ برآمدکنندگان کی سہولت کیلیے اگلے 2 ماہ میں انہیں کسٹم ہاؤس آئے بغیرکسٹم ریبیٹ خودکار نظام کے تحت جاری کر دیا جائے گا۔ انھوں نے برآمدی کنسائمنٹس سے متعلقہ ایل سی ایل کارگو کو فوری طور پر کلیئرنس کی یقین دہانی بھی کرائی۔