کراچی؛ لڑکی کو مبینہ ہراساں کرنے پر گرفتار ٹیکسی ڈرائیور کی ضمانت

 کراچی:  مقامی عدالت نے لڑکی کو مبینہ طور پر ہراساں اور اغوا کرنے کے مقدمے میں آن لائن ٹیکسی ڈرائیور کی 10 ہزار روپے کی ضمانت منظور کرلی۔

کراچی سٹی کورٹ میں اسپیشل جوڈیشل مجسٹریٹ کے روبرو صدر تھانہ پولیس نے آن لائن ٹیکسی سروس کے  ڈرائیور کو پیش کیا۔ عدالت نے 55 سالہ ذوالفقار علی کی 10 ہزار روپے کے عوض ضمانت منظور کرلی۔

یہ بھی پڑھیں: کراچی میں لڑکی چلتی ٹیکسی سے کود گئی، ڈرائیور پر ہراسانی کا الزام

پولیس کے مطابق ہفتے کے روز آن لائن ٹیکسی ڈرائیور کی جانب سے مبینہ اغوا کی کوشش پر لڑکی نے چلتی گاڑی سے شارع فیصل پر چھلانگ لگادی تھی۔ متاثرہ لڑکی 24 سالہ حریم میڈیکل کی طالبہ ہے جس نے گلشن اقبال بیت المکرم سے ڈیفنس جانے کے لیے آن لائن ٹیکسی کی خدمات حاصل کی تھیں۔

ڈرائیور نے اس الزام کو رد کرتے ہوئے کہا ہے کہ حریم نے خود گاڑی کا روٹ تبدیل کیا تھا اور ڈیفنس کی بجائے عسکری کے علاقے کی طرف جانے کا کہا تھا۔