تازہ ترین

پی اے سی سندھ کی 10 سالہ کارکردگی سوالیہ نشان

پبلک اکاؤنٹس کمیٹی کی آڈٹ رپورٹس سے متعلق ہوشربا اعداد و شمار سامنے آگئے۔

وکیل راؤ جمعـء 2 نومبر 2018

4 سال میں سندھ اسمبلی پبلک اکاؤنٹس کمیٹی کے 75 اجلاس ملتوی، منسوخ ہوئے۔ فوٹو: فائل

کراچی: سندھ اسمبلی کی پبلک اکاؤنٹس کمیٹی کی غیر فعالیت اور آڈٹ رپورٹس سے متعلق ہوشربا اعداد و شمار سامنے آگئے۔

پی اے سی کی 10 سالہ کارکردگی سوالیہ نشان بن گئی، سندھ اسمبلی کی پبلک اکاؤنٹس کمیٹی 10 سالوں کے دوران 20 سے زائد صوبائی محکموں ، ضلعی حکومتوں اور خود مختار کارپوریشنز کے آڈٹ اعتراضات پر فیصلے نہ کرسکی۔

دستیاب اعداد و شمار کے مطابق گزشتہ 4 سالوں کے دوران صوبائی اسمبلی کی پبلک اکاؤنٹس کمیٹی کے 75 اجلاس ملتوی یا منسوخ ہوئے جبکہ کمیٹی کے محض 32 اجلاسوں کا انعقاد ہوسکا، کئی آڈٹ پیراز سیٹل ہی نہیں ہو سکے۔ صوبے کا مالی نظم و نسق اور حکومت پچھلے 10 سالوں سے پیپلزپارٹی کے پاس ہے پچھلے دونوں ادوار میں پبلک اکاؤنٹس کمیٹی کی چیئرمین شپ بھی پیپلزپارٹی کے پاس رہی۔

سندھ اسمبلی کی پبلک اکاؤنٹس کمیٹی کی کارکردگی سے متعلق دستیاب دستاویز کے مطابق سال 2014-15 میں سندھ کے 33 انتظامی محکموں کی مالی بے ضابطگی پر آڈیٹر جنرل نے اپنی رپورٹ میں 385 آڈٹ اعتراضات عائد کیے تاہم بیشتر محکموں کے آڈٹ اعتراضات پر فیصلوں کے لیے پبلک اکاؤنٹس کمیٹی کے اجلاس ہی منعقد نہیں ہوئے، نصف سے بھی کم آڈٹ پیراز پر محکموں کی رپورٹس منظور کی گئیں جبکہ کئی محکموں کے آڈٹ اعتراضات پر فیصلے مؤخر کر دیے گئے۔