وزیراعظم عمران خان کی افواج پاکستان کو پولیو مہم میں کردار ادا کرنے کی ہدایت    

ویب ڈیسک  جمعـء 9 نومبر 2018
وزیراعظم کا سینی ٹیشن کے نظام میں بہتری پر زور۔ فوٹو : فائل

وزیراعظم کا سینی ٹیشن کے نظام میں بہتری پر زور۔ فوٹو : فائل

 اسلام آباد: وزیراعظم عمران خان نے افواج پاکستان سمیت قانون نافذ کرنے والے اداروں کو پولیو مہم میں کردار ادا کرنے کی ہدایت کی ہے۔

وزیراعظم کی زیر صدارت انسداد پولیو کے حوالے سے ٹاسک فورس کا اجلاس ہوا جس میں نیشنل کوآرڈینیٹر نے اجلاس کو بتایا کہ 2014 میں پولیو کیسز 306 تھے جو کم ہو کر رواں سال 8 رہ گئے، بلوچستان میں 3 کیسز کا وائرس بھی پشاور کا ہے جب کہ انسداد پولیو مہم ٹیم اور صحت محافظ کے ساتھ تعاون کے لیے خصوصی آگاہی مہم شروع کر دی ہے۔

اجلاس میں وزیراعظم کو بتایا گیا کہ افغانستان میں پولیو کی مکمل ویکسینیشن تک پاکستان پولیو کے خطرے سے دوچار رہے گا جب کہ کراچی کا گڈاپ ٹاؤن اور پشاور پولیو کے لیے انتہائی حساس اور خطرناک علاقے قرار دیے گئے۔

اجلاس میں وزیراعظم عمران خان نے سینی ٹیشن کے نظام میں بہتری پر زور دیتے ہوئے 3 سال کے لیے پولیو کے حوالے سے پی سی ون میں اضافے کی منظوری کی ہدایات کی، اس کے علاوہ وزیراعظم نے افواج پاکستان سمیت قانون نافذ کرنے والے اداروں کو پولیو مہم میں کردار ادا کرنے کی بھی ہدایت کی۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔