ترک صدر کا 103 فوجی افسران اور اہلکاروں کی گرفتاری کا حکم

ویب ڈیسک  ہفتہ 10 نومبر 2018
ترک صدر کا تختہ الٹنے کے لیے ان افسران نے فوجی بغاوت میں اہم کردار ادا کیا تھا۔ فوٹو : فائل

ترک صدر کا تختہ الٹنے کے لیے ان افسران نے فوجی بغاوت میں اہم کردار ادا کیا تھا۔ فوٹو : فائل

 انقرہ: ترک صدر طیب اردگان نے ناکام فوجی بغاوت میں ملوث 103 فوجی افسران اور اہلکاروں کو گرفتار کرنے کا حکم جاری کردیا ہے۔

ترک میڈیا کے مطابق دو سال قبل ترکی میں ناکام فوجی بغاوت کے اہم کرداروں کی گرفتاری کا فیصلہ کرلیا گیا ہے اور اس حوالے سے جاری نئی فہرست میں 103 فوجی اہلکاروں کا نام شامل کیا گیا ہے جن میں حاضر کرنل بھی شامل ہیں۔

ان فوجی اہلکاروں پر امریکا میں خود ساختہ جلاوطنی کاٹنے والے ترک صدر کے مخالف  اپوزیشن رہنما فتح اللہ گولن کے حامی ہونے کا الزام ہے۔ ان افسران اور اہلکاروں نے فوجی بغاوت میں نمایاں کردار ادا کیا تھا۔

ترک صدر کے حکم کے بعد پولیس نے ملک کے مختلف حصوں میں چھاپا مار کارروائی کرتے ہوئے 74 فوجی افسران اور سپاہیوں کو حراست میں لے لیا ہے جن میں کرنل اور لیفٹیننٹ کرنل کے عہدے پر فائز حاضر افسران بھی شامل ہیں۔

قبل ازیں 2016 میں ہی ناکام فوجی بغاوت کے بعد اپوزیشن رہنما فتح گولن کے سیکڑوں حامیوں، فوجی اہلکاروں، اپوزیشن رہنماؤں، صحافیوں اور غیر ملکی افراد کو بھی حراست میں لیا گیا تھا جن میں سے اکثر کو سزائیں بھی دی جا چکی ہیں۔

واضح رہے کہ 15 جولائی 2016 میں ترک صدر طیب اردگان کی حکومت کا تختہ الٹنے کے لیے فوجی بغاوت کی گئی تھی تاہم عوام نے مزاحمت کر کے اس کوشش کو ناکام بنادیا تھا لیکن اس دوران سیکڑوں شہری فوجیوں کی گولیوں کا نشانہ بن گئے تھے اور چند فوجی اہلکار بھی ہلاک ہوئے تھے۔



ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔