مقبوضہ کشمیر میں پنچایت الیکشن کا مکمل بائیکاٹ اور شٹر ڈاؤن ہڑتال

پولنگ اسٹیشن عملہ اور سیکیورٹی اہلکاروں سے بھرے ہوئے لیکن ووٹرز سے خالی

ویب ڈیسک ہفتہ 17 نومبر 2018

پولنگ اسٹیشن پر سیکیورٹی اہلکار اور عملہ موجود ہے لیکن ووٹرز غائب ہیں۔ فوٹو : کشمیر میڈیا

سری نگر: مقبوضہ کشمیر میں حریت رہنماؤں کی اپیل پر نام نہاد پنچایت الیکشن کا بائیکاٹ اور شٹر ڈاؤن ہڑتال کی جارہی ہے۔

بین الاقوامی خبر رساں ادارے کے مطابق جنت نظیر وادی میں آج مکمل ہڑتال کی جا رہی ہے۔ مودی سرکار کی جانب سے پنچایت الیکشن کے ڈھونگ کا حریت رہنماؤں کی اپیل پر مکمل بائیکاٹ کیا جارہا ہے۔

اس موقع پر تمام شاہراؤں پر ہُو کا عالم ہے جب کہ کاروباری مراکز، تعلیمی ادارے اور عدالتیں بند ہیں۔ بھارت نواز کٹھ پتلی انتظامیہ نے بھاری تعداد میں نفری تعینات کر رکھی ہے اور لوگوں کو ووٹ ڈالنے کے لیے مجبور کیا جا رہا ہے۔

سیکیورٹی فورسز کی دھمکیوں کے باوجود کشمیر کی غیور عوام نے حریت رہنماؤں کی اپیل پر لبیک کہتے ہوئے بلدیاتی الیکشن کی طرح آج پنچایت الیکشن کا بھی مکمل بائیکاٹ کیا جس کے باعث پولنگ اسٹیشن پر سناٹا ہے۔

واضح رہے کہ گزشتہ ماہ کے آخری ہفتے میں بلدیاتی الیکشن کے موقع پر وادی میں مکمل بائیکاٹ کیا گیا تھا جس کے باعث ووٹنگ کی شرح محض 4 فیصد رہی تھی جو کہ کشمیر کی تاریخ کی کم ترین شرح تھی۔