ہاکی ورلڈ کپ کے لئے پاکستان ٹیم کونئی کٹ مل گئی

 لاہور: ہاکی ورلڈ کپ کے لئے قومی ٹیم کو نئی کٹ مل گئی ہے اور اب کھلاڑی چاند ستارے والی شرٹس پہن کر بھارت میں شیڈول میگا ایونٹ کے دوران ایکشن میں دکھائی دیں گے۔

ورلڈ کپ کے لئے پاکستان ہاکی ٹیم کی کٹ کی تقریب رونمائی لاہور میں ہوئی جس میں صدر پی ایچ ایف خالد سجاد کھوکھر، پشاور زلمی کے مالک جاوید آفریدی، ہیڈ کوچ توقیر احمد ڈار سمیت ٹیم کے تمام کھلاڑیوں، ملکی اور غیر ملکی مہمان بھی موجود تھے۔

اس موقع پر ہاکی ورلڈ کپ کے لیے پاکستان ہاکی ٹیم کا خصوصی طور پر تیار کردہ اینتھم بھی پیش کیا گیا جسے معروف موسیقار کمپوزر ساحر علی بگا اور شہاب نے تیار کیا ہے۔

تقریب سے خطاب میں پشاور زلمی کے چیئرمین جاوید آفریدی نے کہا کہ ماضی میں چار بار ورلڈ کپ، تین بار چیمپینز ٹرافی اور تین بار اولمپکس گولڈ میڈل جیت کر پاکستان ہاکی ٹیم نے سبز ہلالی پرچم بلند کیا، امید ہے کہ ٹیم بھارت میں ہونے والے ہاکی ورلڈ کپ میں اچھی کاکردگی کامظاہرہ کرے گی۔ انہوں نے پاکستان ہاکی ٹیم کے لیے نیک خواہشات کا اظہار بھی کیا۔

یہ بھی پڑھیں :ورلڈ کپ کیلیے پاکستان ہاکی ٹیم کو بھارتی ویزوں کا اجرا ہو گیا

صدر پی ایچ ایف خالد سجاد کھوکھر نے کہا کہ ورلڈ کپ کے لئے ہاکی ٹیم کو اسپانسر کرنے پر جاوید آفریدی کے مشکور ہیں، اسپانسر ملنے سے کھلاڑیوں کی حوصلہ افزائی ہوئی ہے۔

انہوں نے کہا کہ موجودہ ہاکی ٹیم میں آگے بڑھنے کی صلاحیت موجود ہے، امید ہے کہ کھلاڑی بھارت کے خلاف عمدہ کارکردگی دکھانے میں کامیاب رہے گی۔

تقریب کے دوران قومی کپتان رضوان سینئر اور ہیڈ کوچ توقیر ڈار خاصے مسرور دکھائی دیے اور انہوں نے ورلڈکپ کے دوران شائقین کو عوامی توقعات پر پورا اترنے کی یقین دہانی بھی کرائی۔

ہاکی ورلڈ کپ 28 نومبر سے بھارتی شہر بھوبینشور میں ہوگا، مجموعی طور پر 16 ٹیمیں شریک ہوں گی، پاکستانی ٹیم اپنا پہلا میچ یکم دسمبر کو جرمنی کے خلاف کھیلے گی۔