افغانستان، نیٹو فورسز کی بمباری، 40 طالبان ہلاک

کابل / لندن: افغانستان میں نیٹو فورسز کی بمباری میں 40 طالبان ہلاک ہوگئے جبکہ بم دھماکے میں 4 شہری جاں بحق اور 12 زخمی ہوگئے، ایک برطانوی فوجی بھی مارا گیا، ذرائع ابلاغ کے مطابق صوبہ کنڑ کے ضلع چپا درا میں 80 کے قریب طالبان ایک قاتل کو سرعام پھانسی دینے کیلئے جمع تھے کہ اسی دوران اتحادی فوج نے بمباری کردی جس میں 40 طالبان ہلاک اور متعدد زخمی ہوگئے، ایساف کے ترجمان کے مطابق حملے میں کوئی شہری زخمی یا ہلاک نہیں ہوا۔

طالبان ترجمان زبیح اللہ مجاہد نے حملے کی تصدیق کرتے ہوئے بتایا کہ حملے میں صرف 13 جنگجو مارے گئے ہیں، دوسری طرف صوبہ ہرات کے ضلع شنداند کے ایک بازار میں ایک بم پل کے نیچے نصب کیا گیا تھا جو اچانک پھٹ گیا جس میں عید کی خریداری کرنے والے 4 شہری جاں بحق اور درجن سے زائد زخمی ہوگئے جن میں تین پولیس اہلکار بھی شامل ہیں.

صوبائی حکام نے ہلاکتوں کی تصدیق کردی ہے، دریں اثنا صوبہ ہلمند کے ضلع نہر سراج میں طالبان کے حملے میں ایک برطانوی فوجی بھی مارا گیا، برطانوی وزارت دفاع نے ہلاکت کی تصدیق کردی ہے۔ ادھر اوباما انتظامیہ اور پینٹاگون نے افغانستان میں نیٹو ہیلی کاپٹر کی تباہی پر صدمہ اور تشویش کا اظہار کیا ہے جس میں 7امریکی، 3افغان فوجی اور ایک مقامی ترجمان ہلاک ہوگیا تھا۔