پشاور کے علاقے پشتخرہ میں فائرنگ سے 2 پولیس اہلکار جاں بحق

ویب ڈیسک  پير 1 جولائ 2013
پولیس اہلکاروں پر فائرنگ کرنے والے موٹر سائیکل پر سوار تھے، عینی شاہدین۔ فوٹو: فائل

پولیس اہلکاروں پر فائرنگ کرنے والے موٹر سائیکل پر سوار تھے، عینی شاہدین۔ فوٹو: فائل

پشاور: رنگ روڈ پر پولیس چیک پوسٹ پر نامعلوم موٹر سائیکل سواروں کی فائرنگ سے دو اہلکار جاں بحق ہوگئے۔

ایکسپریس نیوز کے مطابق پشاور کے علاقے پشتخرہ میں موٹر سائیکل پر سوار 2 افراد نے رنگ روڈ پر عباس ٹرمینل کے ساتھ  چیک پوسٹ پر فائرنگ کردی جس کے نتیجے میں  اسپیشل پولیس فورس کے 2 اہلکار سلیمان اور عثمان زخمی ہوگئے، واقعے کی اطلاع ملتے ہی پولیس کی بھاری نفری جائے وقوعہ پہنچ گئی اور زخمی اہلکاروں کو طبی امداد کے لئے اسپتال پہنچایا جہاں وہ زخمیوں کی تاب نہ لاتے ہوئے دم توڑ گئے، واقعے کے بعد پولیس کی نفری نے علاقے کو گھیرے میں لے کر سرچ آپریشن شروع کردیا۔

واضح رہے کہ پشاور کے علاقے بڈھ بیر میں گزشتہ روز بھی دھماکا ہوا تھا جس کے نتیجے میں 19 افراد جاں بحق ہوگئے تھے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔