سوڈان میں ہیلی کاپٹر حادثے میں گورنر اور وزیراعلیٰ کی ہلاکت کی تصدیق

ویب ڈیسک  پير 10 دسمبر 2018
ہیلی کاپٹر لینڈنگ کے دوران موبائل ٹاور سے ٹکرا کر تباہ ہوگیا۔ فوٹو۔ سونا (SUNA)

ہیلی کاپٹر لینڈنگ کے دوران موبائل ٹاور سے ٹکرا کر تباہ ہوگیا۔ فوٹو۔ سونا (SUNA)

خرطوم: مغربی سوڈان میں گورنر اور وزیراعلیٰ کو لے جانا والا ہیلی کاپٹر حادثے کا شکار ہوگیا جس کے نتیجے میں 5 افراد ہلاک ہوگئے۔

بین الاقوامی خبر رساں ادارے کے مطابق سوڈان کی ریاست القضارف میں گورنر سمیت اہم حکومتی شخصیات کو لے جانے والا ہیلی کاپٹر لینڈنگ سے قبل موبائل فون ٹاور سے ٹکرا کر تباہ ہوگیا۔

سرکاری ٹیلی ویژن نے ہیلی کاپٹر حادثے میں القضارف کے گورنر میر غنی صالح ، اُن کی کابینہ کے وزیراعلیٰ، صوبائی وزیر برائے زراعت، مقامی پولیس چیف اور بارڈر فورس کے محافظ  کے ہلاک ہونے کی تصدیق کی ہے۔ ہیلی کاپٹر حادثہ ایتھوپیا کے سرحدی علاقے کے نزدیک پیش آیا تاہم سرکاری ٹیلی ویژن نے حادثے کی وجہ نہیں بتائی۔

دوسری جانب سوڈان کی نیوز ایجنسی سونا (SUNA) نے گورنر سمیت 6 اعلیٰ حکومتی شخصیات کی ہلاکت اور فوجی اہلکاروں کے زخمی ہونے کا دعویٰ کیا ہے۔ زخمیوں کو قریبی اسپتال میں طبی امداد فراہم کی جارہی ہے۔

واضح رہے سوڈان کے زیادہ تر طیارے اور ہیلی کاپٹرز روسی ساختہ اور پرانے ہیں جس کے باعث حادثات معمول ہیں۔ رواں برس ستمبر میں فوجی طیارہ تباہ ہونے سے دو پائلٹ ہلاک جب کہ اکتوبر میں دو فوجی طیاروں میں تصادم سے 6 افراد زخمی ہوگئے تھے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔