اسرائیلی وزیراعظم نیتن یاہو سفاک قاتل ہیں، ترک وزیر خارجہ

 انقرہ: ترک وزیر خارجہ میولوت چاوش نے اسرائیلی وزیراعظم نیتن یاہو کو شدید تنقید کا نشانہ بناتے ہوئے ’سفاک قاتل‘ قرار دے دیا۔

بین الاقوامی خبر رساں ادارے کے مطابق ترکی کے وزیرخارجہ میولوت چاوش نے اسرائیلی وزیراعظم نیتن یاہو کو مقبوضہ فلسطین پر جاری ظلم و بربریت پر جدید دور کا سفاک قاتل قرار دے دیا۔

سماجی رابطے کی ویب سائٹ ٹویٹر پر ترک اور اسرائیل کے درمیان لفظی گولہ باری کا آغاز ترک صدر کے ایک بیان پر اسرائیلی وزیراعظم کی ٹویٹ سے ہوا، نیتن یاہو نے قبرص میں کردوں کے خلاف آپریشن کو نسل کشی قرار دیتے ہوئے اردگان حکومت کو شدید تنقید کا نشانہ بنایا۔

Erdogan – the occupier of northern Cyprus, whose army massacres women and children in Kurdish villages, inside and outside Turkey – should not preach to Israel.

— Benjamin Netanyahu (@netanyahu) December 22, 2018

اسرائیلی وزیراعظم نیتن یاہو کی ٹویٹ پر ترک صدر طیب اردگان کے ترجمان ابراہیم کیلن نے طنزاً لکھا کہ کرپشن الزامات کا سامنا کرنے والے اسرائیلی وزیراعظم کردوں کی ہمدردی سمیٹنے کی کوشش میں اپنے اندرونی مسائل سے جان نہیں چھڑا پائیں گے۔

ترک صدر کے ترجمان نے مزید لکھا کہ نیتن یاہو کو ترک صدر کے سچ بولنے پر اعتراض کرنے کے بجائے فلسطین پر اپنے قبضے اور فلسطینی شہریوں پر بہیمانہ تشدد اور نسل کشی کے عمل کو ختم کرنا چاہیئے۔

Instead of begging President Erdoğan not to speak out the truth, @netanyahu should end the lawless occupation of Palestinian lands and the brutal oppression of Palestinian people. Bashing Erdoğan or using Kurds as a political chip will not save him from his domestic troubles. https://t.co/I6YdwDP2v4

— Ibrahim Kalin (@ikalin1) December 23, 2018