انڈر 19 کرکٹ؛ آسٹریلیا کیلیے فائنل میں پہنچنا دشوار

ڈارون:   ٹرائنگولرانڈر 19 کرکٹ سیریز میں بھارت سے7 وکٹ کی شکست کے بعد آسٹریلیا کے لیے فائنل میں پہنچنا دشوار ہوگیا۔

اگرچہ کینگروز ابھی تک رن ریٹ میں بہتری کی بنیاد پر دوسری پوزیشن پر ہیں لیکن بدھ کو نیوزی لینڈ کی ٹیم آخری لیگ میچ میں بلو شرٹس کو ہرا کر میزبان سے آگے نکل سکتی ہے، ناقابل شکست بھارتی ٹیم پہلے ہی فیصلہ کن معرکے میں جگہ پکی کرچکی ہے۔ تفصیلات کے مطابق ڈارون کے گرم موسم میں میزبان آسٹریلوی پلیئرز کو مشکلات کا سامنا رہا۔

ٹاس جیتنے والے مہمان کپتان وجے زول نے میزبان ٹیم کو بیٹنگ کی دعوت دی، اوپنرز میتھیو شارٹ اور ٹام لیویر  نے اننگز کا محتاط انداز میں آغاز کیا، 59 کے مجموعے پر عامر غنی کے ہاتھوں اوپننگ شراکت ختم ہوگئی، شارٹ(34)  ان کا پہلا شکار بنے جبکہ 79 کے ٹوٹل پر دوسرے افتتاحی کھلاڑی لیویر (23) بھی ان کا شکار بن گئے۔

ڈیمین مورٹیمر(18) اور بین میکڈرمٹ(12) کے جلد میدان بدر ہونے کے بعد لوئرآرڈر میں جیک ڈوران نے 52 گیندوں پر 41 رنز بناکر ٹیم کو سنبھالا، کیم ویلینٹ 25 گیندوں پر 28 رنز بنا کر ناٹ آؤٹ رہے، کینگروز نے مقررہ 50 اوورز میں 6 وکٹ پر 191 رنز اسکور بورڈ پر جوڑے، بھارت کو جوابی اننگز میں میزبان بولرز کی جانب سے کچھ خاص مزاحمت کا سامنا نہیں رہا، اوپنر انکش بیانز (20) کے آؤٹ ہونے کے بعد  اکھیل ہردویکر (60) اور کپتان وجے زول (64) نے ٹیم کی فتح میں اہم کردار ادا کیا،ان کے درمیان دوسری وکٹ کے لیے 107 رنز کی قیمتی شراکت قائم ہوئی، ایک رن کے فرق سے دونوں پلیئرز یکے بعد دیگرے آؤٹ ہوگئے۔

سنجو سیمسن 24 اور محمد سیف21 پر ناٹ آؤٹ رہے، میتھیو فوٹیا نے 2 جبکہ شارٹ نے ایک وکٹ حاصل کی۔میچ کے بعد میڈیا سے گفتگو کرتے ہوئے آسٹریلوی کوچ اسٹورٹ لا نے کہا کہ ہمیں اندازہ ہے کہ ہم اس مقام پر نہیں ہیں جہاں ہونا چاہیے تھا لیکن یہ سب کچھ راتوں رات نہیں ہو سکتا ، ہم سخت محنت کو اپنا شعار بنائے ہوئے ہیں، ٹیم ایونٹ میں اپنی پرفارمنس سے کہیں بہتر کھیل پیش کرسکتی تھی مگر ایسا نہ ہوا جو نہ صرف میرے بلکہ پلیئرز کے لیے بھی مایوس کن امر ہے۔