کرن مورے سہواگ اور گمبھیر کی ٹیم واپسی کے حامی

نئی دہلی: سابق بھارتی کرکٹ چیف سلیکٹرکرن مورے  اوپنرز شیکھر دھون اور روہت شرما کی عمدہ کارکردگی کے باوجود وریندر سہواگ اور گوتم گمبھیر کی ٹیم میں واپسی کے حامی ہیں۔

ان کا کہنا ہے کہ دونوں  نے ماضی میں ٹیم کے لیے کئی بہت ہی شاندار اننگز کھیلی ہیں، ان کو یکسر نظرانداز کردینا درست نہیں ہوگا، صلاحیتوں کے اظہار کیلیے  واپسی کا موقع فراہم کیا جانا چاہیے۔ اپنے ایک انٹرویو میں انھوں نے کہا کہ پلیئرز کی وافر دستیابی اور ٹیم میں مقابلے کی فضا بھارتی کرکٹ کے روشن مستقبل کی علامت ہے،کوچ اور کپتان کو ٹیم کیلیے بہتر سے بہتر کھلاڑی میسر آتے ہیں۔  انھوں نے کہا  موجودہ سلیکشن کمیٹی کو گوتم یا سہواگ میں سے ایک اوپنر کو ضرور ٹیم کا حصہ بنانا چاہیے، اس سے دونوں پر ہرصورت پرفارم کرنے کیلیے دباؤ  بڑھے گا اور انجریز کی صورت میں کپتان کے پاس زیادہ آپشنز بھی موجود ہوں گی۔

کرن مورے نے کہا کہ بھارتی ٹیم میں  دھون اور شرما  بہترین کارکردگی کا مظاہرہ کررہے ہیں، دونوں نے بہت کم وقت میں اپنے آپ کو ایک دوسرے کے ساتھ ایڈجسٹ  کرلیا ہے۔ انھوں نے دھونی کو مشورہ دیا کہ ماضی میں کئی اہم میچز جتوانے والے گھمبیر اور سہواگ کو مشکل وقت میں تنہا نہ چھوڑیں اگر وہ ڈومیسٹک کرکٹ میں پرفارم کرتے ہیں تو انہیں ٹیم میں واپسی کا موقع ضرور ملنا چاہیے، دونوں میں سے ایک کی موجودگی کپتان کو درکار ایک اچھے مشیر کی کمی بھی پوری کرسکتی ہے۔