چینی قونصلیٹ حملے کے ملزمان 5 روزہ جسمانی ریمانڈ پر پولیس کے حوالے

ویب ڈیسک  ہفتہ 12 جنوری 2019
ملزمان میں احمد حسنین، نادر خان، علی احمد، عبدالطیف اور اسلم شامل فوٹو:فائل

ملزمان میں احمد حسنین، نادر خان، علی احمد، عبدالطیف اور اسلم شامل فوٹو:فائل

 کراچی: انسداد دہشت گردی کی عدالت نے چینی قونصل خانے پر حملے کے 5 ملزمان کو 17 جنوری تک جسمانی ریمانڈ پر پولیس کے حوالے کردیا۔

کراچی میں انسداد دہشت گردی کی عدالت میں چینی قونصل خانے پر حملے سے متعلق کیس کی سماعت ہوئی تو گلشن معمار پولیس نے پانچ سہولت کاروں کو پیش کیا۔ ملزمان میں احمد حسنین، نادر خان، علی احمد، عبدالطیف اور اسلم شامل ہیں جنہیں دھماکہ خیز مواد رکھنے اور اسلحہ ایکٹ کے مقدمے میں پیش کیا گیا۔

یہ بھی پڑھیں: چینی قونصل خانے پر حملہ کا مقدمہ داخل دفتر کرنے کی پولیس رپورٹ مسترد

پولیس نے بتایا کہ چینی قونصلیٹ پر حملے کے لیے ریلوے کے ذریعے اسلحہ کراچی لایا گیا اور بلدیہ کے علاقے میں ایک مکان میں چھپایا گیا، حملے کے سہولت کار اور دہشتگرد پریڈی اور لیاری کے علاقوں میں رہتے رہے، دہشت گردی میں استعمال گاڑی آن لائن سروس کے ذریعے مختلف ہاتھوں میں فروخت ہوتی رہی، گرفتار ملزمان نے ہلاک دہشت گردوں کو سہولت فراہم کی اور جرم کا اعتراف کیا ہے، جبکہ ان کے قبضے سے ہینڈ گرنیڈ اور آر پی جی راکٹ بھی برآمد کیا گیا ہے۔

پولیس نے ملزمان کے 14 روز کے جسمانی ریمانڈ کی استدعا کی تاہم عدالت نے ملزمان کا 5 روزہ جسمانی ریمانڈ منظور کرلیا۔ عدالت نے تفتیشی افسر نصرت شیخ کو حکم دیا کہ ملزمان کی اہل خانہ سے ملاقات کرائی جائے۔



ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔