پاک فوج سعودی آرمی کو بھرپور تعاون دینے کو اپنی ذمہ داری سمجھتی ہے، آرمی چیف

ویب ڈیسک  بدھ 23 جنوری 2019
جنرل قمر جاوید باجو ہ کا سعودی عرب کی طرف معاونت کے اعتراف پر شکریہ، فوٹو: فائل

جنرل قمر جاوید باجو ہ کا سعودی عرب کی طرف معاونت کے اعتراف پر شکریہ، فوٹو: فائل

 راولپنڈی: آرمی چیف جنرل قمر جاوید باجوہ نے کہا ہے کہ پاک فوج نے سعودی فوج کی  صلاحیت بڑھانے کیلئے ذمہ داری کے طور پر معاونت کی۔

پاک فوج کے شعبہ تعلقات عامہ آئی ایس پی آر کے مطابق سعودی عرب کی شاہی فوج کا وفد چیف آف جنرل اسٹاف فیاد بن حامد کی قیادت میں جی ایچ کیو پہنچا جہاں  سعودی جنرل کو گارڈ آف آنر پیش کیا گیا  جب کہ انہوں نے یاد گار شہدا پر پھولوں کی چادر بھی چڑھائی۔

چیف آف جنرل اسٹاف فیاد بن حامد کی قیادت میں وفد نے آرمی چیف جنر قمر جاوید باجوہ سے ملاقات کی جس میں جیو اسٹرٹیجک اور دو طرفہ دفاعی تعاون پر با ت چیت کی گئی۔

سعودی چیف آف جنرل اسٹاف نے پاکستان کی طرف سے معاونت فراہم کرنے بالخصوص شاہی سعودی فوج کو پاکستان میں اور سعودی عرب میں تربیت پر شکریہ ادا کیا۔

آئی ایس پی آر کے مطابق جنرل قمر جاوید باجو ہ نے سعودی عرب کی طرف معاونت کے اعتراف پر شکریہ ادا کرتے ہوئے کہا کہ  پاک فوج نے سعودی فوج کی  صلاحیت بڑھانے کیلئے ذمہ داری کے طور پر معاونت کی۔



ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔