بھارتی کرکٹ ٹیم کو بھی پاکستان کا دورہ کرناچاہیے، آفریدی

اسپورٹس ڈیسک  جمعـء 24 اگست 2012
 آل رائونڈر شاہد آفریدی کی تصویر۔ ۔فوٹو/ایکسپریس

آل رائونڈر شاہد آفریدی کی تصویر۔ ۔فوٹو/ایکسپریس

کراچی: اسٹار آل رائونڈر شاہد آفریدی نے کرکٹ تعلقات کی مکمل بحالی کیلیے بھارت کے دورئہ پاکستان پر زور دیا ہے، ان کا کہنا ہے کہ دونوں ممالک میں کرکٹ کے دوبارہ آغاز کی بات خوش آئند ہے، بھارتی ٹیم کو بھی پاکستان کا جوابی ٹور ضرورکرنا چاہیے۔ تفصیلات کے مطابق پاکستان نے دسمبر میں بھارت کا مختصر سیریز کیلیے ٹور کرنا ہے تاہم آل رائونڈرآفریدی سمجھتے ہیں کہ دونوں ممالک کے درمیان کرکٹ تعلقات کی مکمل بحالی کیلیے ضروری ہے کہ بھارت بھی پاکستان کا جوابی ٹور کرے۔

انھوں نے کہا کہ مجھے یہ دیکھ کر کافی خوشی ہوئی ہے کہ آخرکار پاکستان اور بھارت رواں سال کے اختتام پر کرکٹ تعلقات بحال کرنے پر راضی ہوگئے ہیں، یہ اچھی خبر ہے کہ پاکستان دسمبر میں بھارت کا دورہ کرنے والا ہے، یہ ایک بڑی سیریز ہونی چاہیے مگر میں سمجھتا ہوں کہ بھارت کو بھی پاکستان کا دورہ کرنا چاہیے کیونکہ یہ دونوں ممالک کے درمیان تعلقات کی بحالی کیلیے ضروری ہے، دونوں ممالک کو اب ایک دوسرے کے ساتھ باقاعدگی سے کرکٹ کھیلنا چاہیے۔

کیونکہ اس کے عالمی کرکٹ پر گہرے اثرات مرتب ہوتے ہیں، بھارتی ٹیم کے پاکستان کا دورہ کرنے سے دوسری ٹیموں کو بھی یہاں آکر کھیلنے کا حوصلہ ملے گا جوکہ سیکیورٹی خدشات کی وجہ سے گھبرا رہی ہیں۔ پاکستان ٹیم دسمبر کے آخر میں شیڈول ٹور کے دوران تین ون ڈے اور دو ٹوئنٹی 20 میچزکھیلے گی۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔