سلووینیا کے رکن اسمبلی کو بغیر ادائیگی سینڈوچ کھانے پر استعفی دینا پڑگیا

ویب ڈیسک  جمعـء 15 فروری 2019
سینڈوچ کی ادائیگی کے لیے 3 منٹ تک کھڑا رہا لیکن ملازمین باتوں میں مصروف تھے، رکن اسمبلی کا موقف (فوٹو : فائل)

سینڈوچ کی ادائیگی کے لیے 3 منٹ تک کھڑا رہا لیکن ملازمین باتوں میں مصروف تھے، رکن اسمبلی کا موقف (فوٹو : فائل)

لیوبلیلانا: سلووینیا کے رکن اسمبلی داریچ قارا چچ ایک دکان سے بغیر ادائیگی کے سینڈوچ کھانے اور جھگڑا کرنے پر پارٹی رکنیت کی منسوخی کے بعد پارلیمنٹ سے بھی مستعفی ہوگئے۔

بین الاقوامی خبر رساں ادارے کے مطابق رکن اسمبلی نے سلووینیا کے دارالحکومت لیوبلیلانا کی ایک مارکیٹ میں دکان داروں کے ساتھ بدتمیزی کی اور سماجی سروے کے بہانے رقم ادا کیے بغیر سینڈوچ کھالیا تھا جس پر پارٹی نے ان کی رکنیت منسوخ کر دی۔

سلووینیا کے رکن پارلیمان داریچ قارا چچ نے پارلیمانی کمیٹی کے اجلاس کے بعد میڈیا کو اپنا موقف دیتے ہوئے کہا کہ سینڈوچ کی قیمت ادا کرنے کا منتظر تھا مگر ملازمین اپنی ڈیوٹی کرنے کے بجائے باتوں میں مصروف تھے، میں نے ملازمین کو سبق سکھانے کی خاطر ایسا قدم اٹھایا۔

رکن پارلیمان کی وضاحت پارٹی کو مطمئن نہ کرسکی اور پارٹی نے ان کی رکنیت منسوخ کرتے ہوئے اسمبلی کی رکنیت سے بھی استعفیٰ طلب کرلیا۔ داریچ قارا چچ نے استعفیٰ دینے کے بجائے مارٹ اور عوام سے اپنے رویے پر معافی بھی مانگی لیکن عوامی دباؤ پر انہیں اپنی رکنیت سے استعفیٰ دینا ہی پڑا۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔