پی ایس ایل؛ شہر کی سجاوٹ یکم مارچ سے شروع کی جائیگی

زبیر نذیر خان / اسپورٹس رپورٹر  بدھ 20 فروری 2019
اہم مقامات کے علاوہ شاہراہوں پرانٹرنیشنل اسٹارز کے پوسٹرز آویزاں کیے جائیں گے۔ فوٹو: فائل

اہم مقامات کے علاوہ شاہراہوں پرانٹرنیشنل اسٹارز کے پوسٹرز آویزاں کیے جائیں گے۔ فوٹو: فائل

کراچی: پی ایس ایل 4کے میچزاور فائنل کے موقع پرکراچی کوسجانے کا عمل یکم مارچ سے شروع ہوگا۔

ذرائع کے مطابق بلدیہ عظمیٰ کراچی سمیت شہر کے دیگرمقامی انتظامی اداروں بشمول متعددکنٹونمٹ بورڈز سے قانونی اجازت  نامے حاصل کرلیے گئے ہیں تاہم بعض حل طلب امورکے بعد شہربھرمیں لیگ کے حوالے سے تزئین وآرائش کا عمل شروع ہوجائیگا۔

کوآرڈینیشن کمیٹی کی جانب سے قائد اعظم کے مزارکے قریب وجوار میں خصوصی طور پر پی ایس ایل مقابلوں کی تشہیرکا اہتمام کرنے کی تجویزدی گئی ہے، پی سی بی کے ساتھ سندھ حکومت اورکمشنرکراچی کی جانب سے بھی لیگ کی تشہیری مہم کی جائیگی۔

صوبائی حکومت کے سیکریٹری اسپورٹس اختر حسین مینگل کے مطابق پی ایس ایس ایل میچزکے موقع پرمحکمہ کھیل کے تحت بھی شہربھرمیں مشہور کرکٹرز کے بل بورڈز لگانے کے ساتھ خیرمقدمی بینرز آویزاں کیے جائیں گے اور مہران رنگ کو نمایاں کیا جائیگا۔

دریں اثنا لیگ کی تیاریوں کے سلسلے میں اسپورٹس مینجمنٹ سسٹم کے تحت شہرمختلف مقامات پرنمونے کے طور پرتشہری مہم کا اہتمام کیا گیا،  اس موقع پرکمشنرکراچی افتخارشلوانی، میونسپل کمشنرکے ایم سی ڈاکٹرسیف الرحمان، ڈپٹی کمشنرکراچی ایسٹ احمد علی صدیقی، ڈپٹی کمشنرکراچی ساؤتھ صلاح الدین، اسی ایم ایس گروپ کے جاوید علی ودیگر بھی موجود تھے۔

 



ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔