اپنی خبر خود دینے والا سینسر سے بھرپور جنگل

ویب ڈیسک  اتوار 24 فروری 2019
’اسمارٹ فوریسٹ‘ نامی سسٹم کا ڈیٹا ایک فون پر دیکھا جاسکتا ہے (فوٹو: بشکریہ ٹرے وی)

’اسمارٹ فوریسٹ‘ نامی سسٹم کا ڈیٹا ایک فون پر دیکھا جاسکتا ہے (فوٹو: بشکریہ ٹرے وی)

ساؤ پاؤلو: قیمتی جنگلات میں نایاب درختوں کی دیکھ بھال کوئی آسان کام نہیں کیونکہ ایک ایک درخت کی نشوونما، امراض اور ان کے نقصانات سے بچانے اور دیکھ بھال کے لیے بہت سارے ملازم درکار ہوتے ہیں لیکن اب برازیل کے ایک تجارتی نوعیت کے جنگل کے درختوں پر ایسے اسمارٹ سینسر نصب کیے گئے ہیں جو اپنی خبر خود دے سکتے ہیں یہاں تک کہ ان کا سارا ڈیٹا ایک اسمارٹ فون پر دیکھا جاسکتا ہے۔

یہ کام برازیل میں ٹرے وی نامی کمپنی نے شروع کیا ہے جو ہاتھوں ہاتھ پورے جنگل کی خبر دیتا ہے، یہ درختوں کے انفیکشن، امراض کے حملے اور پودوں کی ابتدائی کیفیات سے ماہرین کو آگاہ رکھتا ہے۔ ان کے بغیر پورے جنگل کو دیکھنے کے لیے دن رات 150 افراد کا عملہ درکار ہوگا۔ یہ عملہ جنگلی جانوروں کے حملے اور دیگر حادثات کا شکار بھی ہوتا رہتا ہے اور یوں ’اسمارٹ فوریسٹ‘ نامی یہ نظام انسانوں کی حفاظت بھی کرتا ہے۔

ہر درخت پر لگا سینسر پورے دن کی روداد جمع کرتا ہے جسے ایپ کے ذریعے اسمارٹ فون پر دیکھا جاسکتا ہے اور اس کے لیے ہر درخت پر ایک سینسر لگانا ہوتا ہے۔ اگلے مرحلے میں درختوں کا ڈیٹا، سیٹلائٹ تصاویر اور الگورتھم کے ذریعے مزید بہتر بناکر ایک پورا منظرنامہ تخلیق کیا جاتا ہے جسے دیکھ کر ماہرین جنگل کی مجموعی صورتحال کو جان سکتے ہیں۔

بنیادی طور پر اسے تجارتی اور مالیاتی جنگلات کی نگرانی کے لیے بہت اچھی طرح استعمال کیا جاسکتا ہے اور کئی برازیلی کمپنیاں اس ٹیکنالوجی  سے استفادہ کررہی ہیں۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔