نیپچون کا نودریافت شدہ چاند نظامِ شمسی کا سب سے چھوٹا چاند قرار

ویب ڈیسک  بدھ 27 فروری 2019
سیارہ نیپچون کے گرد نظامِ شمسی کا سب سے چھوٹا چاند ہیپو کیمپ دریافت ہوا ہے (فوٹو: فائل)

سیارہ نیپچون کے گرد نظامِ شمسی کا سب سے چھوٹا چاند ہیپو کیمپ دریافت ہوا ہے (فوٹو: فائل)

پیساڈینا، کیلیفورنیا: چند روز قبل ماہرین نے سیارہ نیپچون کے گرد زیرِ گردش چاند کا انکشاف کیا تھا اور اب تصدیق ہوئی ہے کہ یہ ہمارے پورے نظامِ شمسی کا سب سے چھوٹا چاند ہے جس کا قطر صرف 21 میل یا 34 کلومیٹر ہے۔

اس چاند کو یونانی دیومالا کے نام پر ’ہیپوکیمپ‘ کا نام دیا گیا ہے۔ ماہرین ہبل خلائی دوربین کی تصاویر اور ڈیٹا کا جائزہ لے رہے تھے نیپچون کے سب سے بڑے چاند ٹرائٹون  کی اندرونی مدار میں مزید چھ چاند دکھائی دیئے لیکن ان میں سے ہیپوکیمپ سب سے چھوٹا ہے اور اتنا مہین ہے کہ 1989ء میں یہاں سے گزرنے والے وائجر دوم خلائی جہاز نے بھی اسے نظر انداز کردیا تھا۔

سرچ فار ایکسٹرا ٹریسٹریئل انٹیلی جینس (سیٹی) کے ماہر مارک شووالٹر نے کہا کہ اسے دیکھنا بہت محال تھا اور یہ خود نیپچون کے بہت قریب ہے۔ بعض ماہرین کا خیال ہے کہ یہ نیپچون کے کسی بڑے چاند کا ٹکڑا ہے جو کسی دمدار ستارے کے تصادم سے الگ ہوکر نیپچون کے گرد گھومنےلگا ہے۔

اس دریافت کےبعد نیپچون کے چاندوں کی تعداد اب 14 ہوگئی ہے۔ اسے دیکھ کر نیپچون اور نظامِ شمسی کی تاریخ کو سمجھنے میں مدد ملے گی۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔