کے پی ٹی 2 پائلٹ بوٹس مارکیٹ سے 30 فیصد مہنگی خرید رہی ہے، ٹرانسپیرنسی

کراچی:  ٹرانسپیرنسی انٹرنیشنل پاکستان نے 2پائلٹ بوٹس مارکیٹ سے 30 فیصد مہنگی خریدنے اور 55 کروڑ روپے کے کنٹریکٹ میں قومی خزانے کو 12 کروڑ 80 لاکھ روپے کا نقصان پہنچانے کے حوالے سے کے پی ٹی کی وضاحت مسترد کر دیا ہے۔

ٹی آئی پی کے مشیر عادل گیلانی کی طرف سے چیرمین کے پی ٹی کو لکھے گئے خط میں کہا گیا ہے کہ کے پی ٹی اور اس کے کنسلٹنٹ میسرز میرین کی وضاحت میں حیران کن اور بے بنیاد وجوہات بیان کی گئی ہیں ، اور اس وضاحت میں اصل میں اس بات کی تصدیق ہوتی ہے کہ کے پی ٹی واقعی بوٹس مہنگی خرید رہی ہے، خط میں کہا گیا ہے کہ میسرز میرین کنسلٹنٹ کی تقرری ہی پبلک پروکیور منٹ رولز2004 کی خلاف ورزی ہے، کے پی ٹی اس کمپنی کو چار سال سے ٹگز اور پائلٹ بوٹس کے حصول کے لیے استعمال کر رہی ہے۔

جس کی پبلک پروکیور منٹ رولز 2004 کے تحت اجازت ہی نہیں ہے، خط میں مزید کہا گیا ہے کہ ٹی آئی پی اپنے موقف پر قائم ہے کہ کے پی ٹی نے بوٹس خریدیں تو یہ نہ صرف رولز 4 کی خلاف ورزی بلکہ 25 سالہ آپریشن کے دوران 50 کروڑ روپے زیادہ بھی ادا کریگی۔