وزیراعظم عمران خان کا شہید نعیم راشد کو قومی اعزازسے نوازنے کا اعلان

ویب ڈیسک  اتوار 17 مارچ 2019
نعیم راشد نے دہشتگردی سے نمٹنے کےلیے کوشش کی،وزیراعظم عمران خان

نعیم راشد نے دہشتگردی سے نمٹنے کےلیے کوشش کی،وزیراعظم عمران خان

 اسلام آباد: وزیر اعظم عمران خان نے کرائسٹ چرچ میں مساجد پر حملہ کرنے والے کو پکڑنے کی کوشش کرتے ہوئے جام شہادت نوش کرنے والے پاکستانی نعیم راشد کو قومی اعزاز سے نوازنے کا اعلان کیا ہے۔

وزیر اعظم عمران خان نے سماجی رابطے کی ویب سائیٹ ٹوئٹر پر اظہار خیال کرتے ہوئے کہا ہے کہ ہم کرائسٹ چرچ میں دہشت گردی سے متاثر ہونے والے پاکستانی خاندانوں کے ساتھ کھڑے ہیں۔

وزیراعظم عمران خان نے واقعے کے دوران دہشتگرد کو پکڑنے کی کوشش کرنے کے دوران جام شہادت نوش کرنے والے پاکستانی شہری نعیم راشد کو خراج عقیدت پیش کرتے ہوئے کہا کہ پاکستان کو میاں نعیم راشد پرفخرہے۔ نعیم راشد نے دہشت گردی سے نمٹنے اور سفید فام دہشت گرد کو پکڑنے کی کوشش کی، بہادری دکھانے پر میاں نعیم کو نیشنل ایوارڈ سے نوازا جائے گا۔

ایبٹ آباد سے تعلق رکھنے والے نعیم راشد اپنے اہل خانہ کے ہمراہ کرائسٹ چرچ میں مقیم تھے۔ 15 مارچ کو وہ اپنے بیٹے کے ہمراہ مسجد میں نماز جمعہ ادا کررہے تھے، اس دوران انہوں نے اپنی جان کی پرواہ نہ کرتے ہوئے حملہ آور کو قابو کرنے کی کوشش کی اور اپنی جان قربان کردی، دہشتگردی کے اس واقعے میں ان کے بیٹے بھی شہید ہوئے ہیں۔



ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔