کینیا میں چور پولیس چوکی سے اسلحہ اور گولیاں لے اُڑا

ویب ڈیسک  بدھ 24 اپريل 2019
چور پولیس چوکی میں صندوق کا تالا توڑ کر 3 رائفلیں اور 2 درجن گولیاں لے اُڑا۔ فوٹو : فائل

چور پولیس چوکی میں صندوق کا تالا توڑ کر 3 رائفلیں اور 2 درجن گولیاں لے اُڑا۔ فوٹو : فائل

نیروبی: کینیا میں نامعلوم چور پولیس چوکی سے اسلحہ اور گولیاں چرا کر فرار ہوگیا۔

بین الاقوامی خبر رساں ادارے کے مطابق کینیا کے علاقے ناندی میں پولیس افسر اور اہلکار چوکی کو لاوارث چھوڑ کر ٹیلی وژن پر فٹ بال میچ دیکھنے کے لیے قریبی بازار چلے گئے اور اس دوران ایک چور نے پولیس چوکی میں ہی نقب لگادی۔ چور صندوق کا تالا توڑ کر اسلحہ اور گولیاں نکال کر فرار ہو گیا۔

ترجمان پولیس کا کہنا ہے کہ چوکی سے 3 رائفلیں اور 2 درجن گولیاں چرائی گئی ہیں، چور کی تلاش میں چھاپے مارے جارہے ہیں جب کہ پولیس افسر اور اہلکاروں کے خلاف غفلت برتنے پر کارروائی کی جائے گی جس کے لیے تحقیقاتی کمیٹی تشکیل دے دی گئی ہے۔

واضح رہے کہ فٹبال دنیا بھر میں ایک مقبول کھیل ہے اور افریقی ممالک میں بھی لوگ اس کھیل کے دلدادہ ہیں اور جب میچ میں کرسٹیانو رونالڈو اور لیونل میسی سے شہرہ آفاق کھلاڑی حصہ لے رہے ہو تو شاید ہی کوئی ہو جو یہ مقابلہ نہ دیکھے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔