اپوزیشن متحد نہیں ہوسکتی یہ سب چلے ہوئے کارتوس ہیں، فردوس عاشق اعوان

 اسلام آباد: معاون خصوصی اطلاعات فردوس عاشق اعوان کا کہنا ہے کہ اپوزیشن کبھی متحد نہیں ہو سکتی صرف ہوائی فائرنگ کر رہی ہے۔ 

اسلام آباد میں پریس کانفرنس کرتے ہوئے معاون خصوصی اطلاعات فردوس عاشق اعوان کا کہنا تھا کہ اپوزیشن کبھی متحد نہیں ہو سکتی صرف ہوائی فائرنگ کر رہی ہے، یہ سب چلے ہوئے کارتوس ہیں، ان تلوں میں کوئی تیل نہیں، وہ دن دور نہیں جب یہ اپوزیشن والے ایک دوسرے پر کارتوس چلائیں گے۔

فردوس عاشق اعوان کا کہنا تھا کہ نیب ریاست کا آزاد اورخود مختار ادارہ ہے،جو آئین اور قانون کے طابع ہے، اپوزیشن کو نیب کی کارروائیوں پر خدشات ہیں یا وہ جہاں سمجھتی ہے نیب نے تجاوز کیا ہے  تو عدالتیں موجود ہیں، اپوزیشن پہلے ہی عدالتوں کے دروازے کھٹکھٹا رہی ہے اب زور زور سے بجانا شروع کر دے، لیکن نیب پر حملے اور دھمکیاں دینے کی بجائے نیب کے سوالوں کے جواب دے دے،  کیوں کہ نیب سے چھپن چھپائی کھیلنا مسئلہ کا حل نہیں ہے۔

معاون خصوصی اطلاعات نے کہا کہ نواز شریف جب ضمانت پر تھے تو ایک دن بھی اسپتال میں نہیں گزارا، 6 چھ ہفتے فائیو اسٹار گھر میں لیٹے رہے،  یہ کیسی پراسرار بیماری ہے جو گھر جاتے ہی ٹھیک، جیل جاتے ہی جان لیوا بن جاتی ہے،  ہم دعا کرتے ہیں کہ بیماری بھی اپنا ایک بیانیہ طے کر لے، نوازشریف  طےکر لیں کہ انہیں  بیماری کیا ہے حکومت معاونت کرے گی۔