آئی جی سندھ پولیس کراچی کے تھانوں کی حدود سے بھی لاعلم

کراچی:  آئی جی سندھ شاہد ندیم بلوچ اس بات سے بھی لاعلم ہیں کہ سپریم کورٹ رجسٹری کس تھانے کی حدود میں واقع ہے۔

اس بات کا ثبوت ان کا وہ جواب ہے جو انھوں نے سپریم کورٹ کراچی رجسٹری میں چیف جسٹس افتخار چوہدری کے استفسار پردیا۔فاضل چیف جسٹس نے آئی جی سندھ سے پوچھا کہ ہم جہاں بیٹھے ہیں وہ جگہ کس تھانے کی حدود میں واقع ہے جس پرانھوں نے بتایا کہ سپریم کورٹ کی عمارت آرٹلری میدان تھانے کی حدود میں واقع ہے حالانکہ وہ آرام باغ تھانے کی حدود میں آتی ہے۔

اس بات کی تصدیق ایس ایچ اوآرام باغ سب انسپکٹر قمرجاوید کیانی نے ایکسپریس سے گفتگوکرتے ہوئے کی۔ایس ایچ او نے بتایا کہ سپریم کورٹ کی عمارت آرام باغ تھانے کی حدود میں ہے۔ واضح رہے سپریم کورٹ کی عمارت ایم آر کیانی روڈ بلمقابل شاہین کمپلکس واقع ہے ۔