پیپلز پارٹی، تحریک انصاف، (ق) لیگ اور جماعت اسلامی کا بلدیاتی انتخابات مل کر لڑنے کا فیصلہ

ویب ڈیسک  منگل 3 ستمبر 2013
بلدیاتی انتخابات میں چاروں جماعتیں ممکنہ حد تک ایک دوسرے کے ساتھ تعاون اور سیٹ ایڈجسٹمنٹ کریں گی، میاں منظور احمد وٹو  فوٹو: فائل

بلدیاتی انتخابات میں چاروں جماعتیں ممکنہ حد تک ایک دوسرے کے ساتھ تعاون اور سیٹ ایڈجسٹمنٹ کریں گی، میاں منظور احمد وٹو فوٹو: فائل

لاہور: پیپلز پارٹی، تحریک انصاف، مسلم لیگ (ق) اور جماعت اسلامی نے بلدیاتی انتخابات مل کر لڑنے کا فیصلہ کیا ہے۔

ایکسپریس نیوز کے مطابق پیپلز پارٹی پنجاب کے صدر میاں منظور احمد وٹو کی رہائش گاہ پر چاروں جماعتوں کا مشترکہ اجلاس منعقد ہوا جس میں جماعت اسلامی کی جانب سے صوبائی سیکریٹری جنرل امیر العظیم، تحریک انصاف کی جانب سے خورشید احمد قصوری،چوہدری اعجاز اور پیپلز پارٹی کی جانب سے تنویر احمد کائرہ، راجا عامر خان اور منیر احمد خان نے شرکت کی جبکہ مسلم لیگ (ق) کے چوہدری ظہیر الدین بذریعہ فون اجلاس میں شریک ہوئے، اجلاس میں چاروں جماعتوں نے مسلم لیگ (ن) کے مقابلے میں بلدیاتی انتخابات مل کر لڑنے اور بلدیاتی مسودہ ایکٹ سپریم کورٹ میں چیلنج کرنے کا بھی فیصلہ کیا۔

اجلاس کے بعد میاں منظور احمد وٹو نے پریس کانفرنس کرتے ہوئے بتایا کہ بلدیاتی انتخابات میں چاروں جماعتیں ممکنہ حد تک ایک دوسرے کے ساتھ تعاون اور سیٹ ایڈجسٹمنٹ کریں گی اور کوشش ہوگی کہ مسلم لیگ (ن) کے مقابلے میں مل کر بلدیاتی انتخابات لڑیں۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔