سپریم کورٹ نے صدر کے بیرون ملک جانے پر پابندی کی پٹیشن پر وفاق کا جواب طلب کرلیا

اسلام آ باد:  سپریم کورٹ نے صدرزرداری کے بیرون ملک جانے پرپابندی لگانے کی درخواست پر ڈپٹی اٹارنی جنرل کوجواب کیلیے ایک ہفتے کی مہلت دیدی۔عدالت نے انھیں مکمل تیاری کے ساتھ پیش ہونے اوردرخواست پر جامع جواب جمع کرانے کاحکم دیا ہے۔

صدر زرداری کو ملک چھوڑنے سے روکنے کیلیے دائر درخواست پر جسٹس خلجی عارف حسین اور جسٹس اعجاز احمد چوہدری پر مشتمل ڈویژن بینچ نے سماعت کی۔ڈپٹی اٹارنی جنرل عمران الحق پیش ہوئے اور بتایاکہ عدالت کانوٹس ایک دن قبل ملا،اس لیے جواب تیار نہیں کیاجا سکا۔درخواست گزارشاہد اورکزئی نے صدرزرداری کے بیرون ملک جانے پر پابندی کی درخواست میموکیس سے الگ کرنے کی استدعاکی اورکہاکہ صدر مملکت کی مدت 8ستمبرکوختم ہورہی ہے اس لیے درخواست پر جلد فیصلہ کرناچاہیے۔

جسٹس خلجی عارف حسین نے کہاکہ عدالت کوکوئی جلدی نہیں،وفاق کا جواب سامنے آنے کے بعد اس پر مناسب آرڈر جاری کیاجاسکے گا،مزید سماعت10ستمبر تک ملتوی کر دی گئی۔واضح رہے شاہداورکزئی نے درخواست میں موقف اپنایاکہ صدرایبٹ آبادآپریشن سے باخبرتھے لیکن انھوں نے اس بارے مسلح افوج کوخبردار نہیں کیا،عدالت سے میموکمیشن کیس کومنطقی انجام تک پہنچانے کیلیے آصف زرداری کی ملک میں موجودگی کویقینی بنانے کی استدعا کی گئی ہے۔بی بی سی کے مطابق بینچ کے سربراہ کا کہنا تھا کہ جب تک فیڈریشن کا جواب نہیں آ جاتااْس وقت تک عدالت اپنی رائے قائم نہیں کر سکتی۔

صدر زرداری کانام ایگزٹ کنٹرول لسٹ میں ڈالنے کیلیے درخواست دائرکرنے والے پٹیشنرکے مطابق صدرکے عہدے کی معیاد8ستمبرکو ختم ہو رہی ہے اور اگراس دوران وہ ملک سے فرارہوگئے توعدالت اس کاتعین کرے کہ اس کی ذمے داری کس پر عائد ہوگی۔ نمائندہ ایکسپریس کے مطابق عدالت عظمیٰ نے5سال سے کم عرصے تک اعلیٰ عدلیہ کے جج رہنے والے افرادکی پنشن سے متعلق فیصلے کیخلاف نظر ثانی درخواستوں پرباقاعدہ سماعت کا فیصلہ کیاہے اور پٹیشنرزکی نظرثانی درخواستیں واپس لینے کی استدعا مستردکر دی۔5رکنی بینچ نے مختصرحکم کے ذریعے ایسے ججوںکی پنشن کوغیر قانونی قراردیا تھا۔ آن لائن کے مطابق سپریم کورٹ نے عدالت عظمیٰ کے وکلاکیلیے ہاسٹل کی تعمیر بارے فنڈزکے عدم اجراپر وفاقی حکومت سے6 ستمبر تک جواب طلب کرلیاہے۔ چیف جسٹس کی سربراہی میں3رکنی بینچ نے سماعت کی۔