گیدڑ بھبکیاں دینے والے بجٹ کا کچھ نہیں بگاڑ سکیں گے، فردوس عاشق اعوان

 اسلام آباد: معاون خصوصی برائے اطلاعات و نشریات فردوس عاشق اعوان کا کہنا ہے کہ گیدڑ بھبکیاں دینے والے بجٹ کا کچھ نہیں بگاڑ سکیں گے۔

اسلام آباد میں پریس کانفرنس کرتے ہوئے معاون خصوصی برائے اطلاعات و نشریات فردوس عاشق اعوان نے کہا کہ شہبازشریف نے ڈھائی گھنٹے تقریر کی جو 3 دن سے چل رہی تھی، جس کو کمر میں تکلیف ہو وہ ڈھائی گھنٹے قوم کو لیکچر نہیں دیتے، قوم کو مبارکباد کہ شہبازشریف صحت یاب ہوگئے ہیں، شہبازشریف نے آج پھر اپنی تشہیر کا آغاز کیا ہے۔

فردوس عاشق اعوان کا کہنا تھا کہ عمران خان کو چور دروازوں سے آنے والے مشن سے نہیں ہٹا سکتے، بجٹ قومی سلامتی اور ملکی دفاع کا ضامن ہے، گیدڑ بھبکیاں دینے والے بجٹ کا کچھ نہیں بگاڑ سکیں گے۔ ان کا کہنا تھا کہ غنڈہ گردی سے نہیں آئینی طریقے سے اپوزیشن ترامیم لائے، قبول کریں گے جب کہ بجٹ سے ناطہ توڑنا عوام سے ناطہ توڑنے کے مترادف ہے۔