تجارتی خسارہ 3 فیصد گھٹ کر 3.295 ارب ڈالر تک محدود

کراچی: پاکستان کی برآمدات میں درآمدات سے نسبتاً زیادہ اضافے کے نتیجے میں رواں مالی سال اب تک تجارتی خسارہ 3.07 فیصد گھٹ گیا۔

جولائی اور اگست 2013 کے دوران پاکستان کو تجارت میں 3 ارب 29 کروڑ 50 لاکھ ڈالر کا خسارہ ہوا جو گزشتہ مالی سال کی اسی مدت میں 3 ارب 40 کروڑ ڈالر رہا تھا، گزشتہ 2 ماہ کے دوران ملکی برآمدات 3.66 فیصد کے اضافے سے 4 ارب 9 کروڑ 10 لاکھ ڈالر رہیں جو جولائی اگست 2012 میں 3 ارب 94 کروڑ 60 لاکھ ڈالر رہیں تھیں، اس طرح رواں مالی سال کے ابتدائی 2 ماہ کے دوران درآمدات صرف 0.54 فیصد بڑھ کر 7 ارب 38 کروڑ 60 لاکھ ڈالر رہیں جو گزشتہ مالی سال کی اسی مدت میں 7ارب 34 کروڑ 60لاکھ ڈالر تھیں۔

پاکستان بیورو شماریات کے مطابق اگست 2013 میں پاکستانی برآمدات 4.75 فیصد بڑھ کر 1 ارب 99 کروڑ 60 لاکھ ڈالر، درآمدات 3.07 فیصد کمی سے 3 ارب 57 کروڑ 20 لاکھ ڈالر اور تجارتی خسارہ 11.45 فیصد گھٹ کر 1 ارب 57 کروڑ 60 لاکھ ڈالر رہا جبکہ اگست 2012 میں برآمدات 1 ارب 90 کروڑ 50 لاکھ ڈالر، درآمدات 3 ارب 68 کروڑ 50 لاکھ ڈالر اور تجارتی خسارہ 1 ارب 78 کروڑ ڈالر رہا تھا۔

اسی طرح جولائی 2013 کے مقابلے میں گزشتہ ماہ 4.75 فیصد، درآمدات 6.35 فیصد اور تجارتی خسارہ 8.31 فیصد گھٹ گیا، جولائی 2013 میں برآمدات 2 ارب 9 کروڑ 50 لاکھ ڈالر، درآمدات 3 ارب 81 کروڑ 40 لاکھ ڈالر اور تجارتی خسارہ 1 ارب 71 کروڑ 90 لاکھ ڈالر رہا تھا۔